«Таптал уонна бэриниилээх буолуу иһин» мэтээллэри туттардылар

Дьиэ кэргэн, таптал, бэриниилээх буолуу күнүгэр, от ыйын 8 күнүгэр, Дьокуускайга Комсомольскай болуоссакка 25-тэн тахса сыл бииргэ олорбут  17 паараҕа «Таптал уонна бэриниилээх буолуу иһин» мэтээллэри туттардылар.

«Таптал уонна бэриниилээх буолуу иһин» мэтээли СӨ Бырабыыталыстыбатын бэрэссэдээтэлин солбуйааччы Георгий Степанов туттарда.

“Биһиги бастаан оскуолаҕа сырыттахпытына, таптал кыыма умайбыта. Оскуоланы бүтэрэн баран, комсомольскай путевканан совхозка үлэлии барбыппыт. Онтон истиҥ иэйиибит күүстээх тапталга кубулуйбута уонна ыал буоларга быһаарыммыппыт. Соторутааҕыта эрэ сыбаайбалаабыт курдук этибит. Билигин түөрт оҕолоохпут, сэттэ сиэннээхпит. Олох суолун устун ыарахаттар да бааллара, ол эрээри үөрүү, дьол да элбэҕэ. Бастакы тапталбыт улахан иэйиитэ күн бүгүҥҥэ диэри уостубат, тоҕо диэтэххэ, ханнык баҕарар балаһыанньаҕа бэйэ-бэйэбитин өйөһөбүт, өйдөһөбүт. Биһиги санаабытыгар, дьиэ кэргэҥҥэ саамай сүрүнэ – бэйэ-бэйэни убаастаһыы, харыстааһын», — диир кэргэнин Светлананы кытта 51 сыл бииргэ олорбут Анатолий Саргыдаев.

Маны таһынан, 25 саастарын туола илик, аан бастаан ыал буолбут пааралар наҕараадаланнылар. Пермяковтарга уонна Ивановтарга дьиэ кэргэн институтун бөҕөргөтөргө уонна  өйүүргэ туһуламмыт демографическай миэрэ быһыытынан 50 тыһыынча солкуобайы туттардылар. Бу миэрэ Ил Дархан көҕүлээһининэн, быйылгыттан киирбитэ.

Үөрүүлээх бырааһынньык чэрчитинэн, 11 элбэх оҕолоох уонна 8 үбүлүөйдээх ыал эмиэ наҕараадаланнылар. «Исповедь любви и верности» видеонан куонкурус уонна оскуола иннинээҕи саастаах оҕолору үөрэтэр тэрилтэлэр икки ардыларыгар «Дьиэ кэргэн үгэстэрэ» бэстибээл кыайыылаахтарын сыанаҕа үөрүүлээх быһыыга-майгыга бэлиэтээтилэр. Тэрээһини эстрада артыыстара музыкальнай нүөмэрдэринэн киэргэттилэр.

Санатан эттэххэ, 2022 сыл бэс ыйын 28 күнүгэр РФ Бэрэсидьиэнэ Владимир Путин  Дьиэ кэргэн, таптал уонна бэриниилээх буолуу күнүн олохтуур туһунан ыйаахха илии баттаабыта.