Тапталлаах учууталбыт сырдык кэриэһигэр кинигэ сүрэхтэннэ

Бу күннэргэ Учууталлар Учууталлара,   кэрэ киһи, улахан дьиэ кэргэн тапталлаах ийэтэ, талааннаах педагог-методист, тэрийээччи, уопсастыбанньык, патриот,  САССР  үтүөлээх учуутала,  Бүлүүтээҕи педагогическай училищеҕа айымньылаахтык үлэлээбит  тапталлаах учууталбыт, ийэбит курдук саныыр, ахтар киһибит Тамара Николаевна Прокопьева сырдык кэриэһигэр саҥа кинигэ бэчээттэнэн таҕыста.

Кинигэни САССР үтүөлээх учуутала, СӨ бэтэрээн учууталларын сэбиэтин салайааччыта, убаастабыллаах Варвара Сергеевна Зверева-Иванова бэйэтинэн эрэдээктэрдээн, түмэн таһаарда. Кинигэҕэ Тамара Николаевна оҕолорун, аймахтарын, биир идэлээхтэрин, элбэх ахсааннаах үөрэнээччилэрин  истиҥ-иһирэх ахтыылара киирдилэр. Кинигэ ис хоһоонун Тамара Николаевна олоҕун уонна  үлэтин өрөспүүбүлүкэбит  үөрэҕириитин сайдыытын, уопсастыбаннай-бэлитиичэскэй олоҕун кытта ситимнэнэн суруллубут киэҥ анаарыылаах ыстатыйалар  дириҥэтэллэр.

Саҥа кинигэ сүрэхтэниитэ  Дьокуускай куоракка СӨ Үөрэҕин министиэристибэтин, ЯРИУ эппиэттээх үлэһиттэрин, бэтэрээн-педагогтар сэбиэттэрин, Тамара Николаевна төрөппүт  оҕолорун, үөрэнээччилэрин  күүһүнэн үрдүк тэрээһиннээхтик  бу дьыл кулун тутар 1 күнүгэр ыытылынна.

Вера СОЛДАТОВА-НАНОВА