Тапталтан тыллыбыт иэйии

Таатта улууһугар Игидэй нэһилиэгэр биһиги биир дойдулаахпыт, оҕобут тэҥэ саныыр күндү кыыспыт Сардаана Попова дириэктэрдээх А.Бояров аатынан норуот айымньытын дьиэтигэр поэзия киэһэтэ ыытылынна.

«Тапталтан тыллыбыт иэйии» диэн бу кэрэ киэһэҕэ саха бэйиэттэрин хоһоонноро тыыннаах музыка доҕуһуолунан истиҥник-иһирэхтик ааҕылыннылар. Судаарыстыбаннай филармониятын музыканнара Светлана Тютрина (виолончель), Максим Аммосов (скрипка), Артем Дедюкин (фортепиано) лирическэй музыкалары толордулар.

Поэзия киэһэтигэр Дьохсоҕонтон «Куорсун», Ытык Күөлтэн «Уран тыл», Уолбаттан «Дьэҥкир алып» уонна Дэбдиргэттэн «Иэйии» айар түмсүүлэр мустаннар олохтоох ааптардар айымньыларыттан саҕалаан сөбүлүүр бэйиэттэрин хоһооннорун тыыннаах музыкаҕа доҕуһуоллатан астына-дуоһуйа аахтылар. Сардаана Дмитриевна дьарыктыыр театральнай куруһуогун оҕолоро кыттыыны ылбыта дьону-сэргэни олус үөртэ.

Онон Тааттаҕа тыыннаах музыка доҕуһуоллаах поэзия киэһэтэ үрдүк таһымҥа ааста.

Бу ааҕыыларга ытык киһибит, Дьохсоҕонтон Эбээ Валябыт — Валентина Харайданова бэйэтэ айбыт икки хоһоонун өйтөн ааҕан көрөөччүлэри үөртэ, сөхтөрдө. Ааҕааччылар, истээччилэр бу ураты истиҥ тэрээһиҥҥэ дуоһуйа сынньаннылар. Өссө да маннык хоһоон киэһэлэрэ буола тураллара буоллар диэн санааларын үллэһиннилэр. Эдэркээн музыканнар кыракый нэһилиэк олохтоохторо тыыннаах музыканы олус сэргээбиттэрин, хоһоону иэйиилээхтик ааҕааччы элбэҕин көрөннөр, истэннэр сөхтүлэр. «Маннык айар киэһэлэргэ ыҥырдаххытына кэлиэхпит», — диэн харда тылы этэннэр олус үөртүлэр, саалаҕа толору мустубут көрөөччүлэргэ махтаннылар.

Тааттаҕа тыыннаах музыка доҕуһуоллаах хоһоон киэһэлэрэ атын нэһилиэктэргэ эмиэ буолуохтара диэн эрэнэбит.

Галина Другина,

Дьохсоҕон, Таатта.

Анна Константинова хаартыскаларга түһэриитэ уонна видеоттан скриннэннэ.