Тапталы дьүһүйэр сонун испэктээк

Сергей Зверев-Кыыл Уолун аатынан Үҥкүү национальнай тыйаатыра быйыл Суорун Омоллоон аатынан Опера уонна балет тыйаатырыгар үҥкүүнэн туруоруллубут, икки оонньуулаах «Ситим» номох-испэктээги иккис төгүлүн көрдөрдө.

«Ситим» испэктээги үҥкүү аныгы тылынан айыллыбыт, олоҥхоҕо, саха норуотун номохторугар уонна сэһэннэригэр олоҕурар. Манна саха норуотун үгэс буолбут култуурата, аныгы үҥкүү-битии, киһи айылгытын көстүүтэ уо.д.а. силбэһэллэр. Испэктээкил Өлүөнэ эбэ хочотугар, «Өлүөнэ очуостара» национальнай паарка таһыгар ыччат бииргэ түмсүбүт үөрүүтүттэн-көтүүтүттэн саҕаланар. Билиҥҥи олох уонна мистика, өбүгэ үгэстэрэ уонна аныгы көстүүлэр силбэһэн, көрөөччүнү кэрэхсэтэллэр.

Бу «Ситим» номох-испэктээкил Үҥкүү тыйаатырын Арассыыйа туруорааччыларын кытары иккис үлэлэрэ буолар. Бу испэктээги туруорааччы-хореограба, «Көмүс Софит» бириэмийэ лауреата, Борис Эйфман балетын тыйаатырын артыыһа Олег Марков (Санкт-Петербург) , композитор — Ян Круль (Иркутскай), либретто ааптара уонна хореограф көмөлөһөөччүтэ, балет кириитигэ Вероника Кулагина (Санкт-Петербург) буолаллар.

Сүрүн дьоруойдары — Көмүс кыыс оруолун Сиан Винокурова, Өксөкү уол оруолун Николай Павлов олус итэҕэтиилээхтик толордулар.

Манна өссө Үрүҥ Айыы Тойон, Арсан Дуолай, Тимир Дьигис абааһы, Күөх Боллох Тойон, ойууннар, кыталыктар, уо.д.а. ураты оруоллар бааллар.

Саалаҕа элбэх оҕолор, бүтүн кылааһынан көһөн кэлбиттэрэ, болҕойон көрөллөрө, ытыс тыаһын харыстаабаттара — көрөөччүлэр бу испэктээги сөбүлээбиттэрин туоһута буолар.

Сыанаҕа таптал бастакы кыымыгар бас бэринии, таптал барыны кыайар күүһүгэр итэҕэйии туһунан киһини долгутар остуоруйаны кэпсиир испэктээк турда. Бу умсугутуулаах остуоруйа саҥа муусука доҕуһуолунан, үҥкүү тылынан кэпсэнэр. Тыйаатыр сыанатыгар бу олох саҥа испэктээк буолла – маннык муусука, декорациялар, көстүүмнэр хаһан да көрдөрүллэ иликтэрэ. «Ситим» эмиэ фольклор үгэстэрин сыанаҕа толкуйдаан көрдөрөр (интерпретация) буолар, бу испэктээккэ ситим быстыбат.

Санаттахха, Владимир Путин култуура билигин, дойдубут уустук кэмигэр, олус улахан суолталааҕын бэлиэтээбитэ. Култуура нөҥүө биһиги духуобунаспыт, үгэспит, норуот быһыытынан уратыбыт бэриллэр. Ыарахан, уустук кэмнэрбитигэр биһиги мантан күүс-уох ылынабыт, санаабытыгар санаа эбинэбит. Ол иһин олохпутугар култуура олус улахан суолталаах, — диэн эппитэ кини.