Таптыыр сахам тылынан…

Олунньу — төрөөбүт тыл ыйа. Саха Өрөспүүбүлүкэтин Национальнай бибилэтиэкэтин «Оҕо ааҕыытын киинэ», улуустааҕы Оҕо бибилэтиэкэтэ, нэһилиэк, оскуола бибилэтиэкэрдэрэ төрөөбүт төрүт тыл уонна сурук-бичик күнүгэр аналлаах «Таптыыр сахам тылынан…» диэн өрөспүүбүлүкэтээҕи дьыктааны оскуола 3 — 8 кылаас үөрэнээччилэригэр анаан ыыттылар.

Уус Алдан улууһун үрдүнэн уопсайа 668 үөрэнээччи кыттыыны ылла. Манна Арыылаах, Баатаҕай, Бэйдиҥэ, Кэптэни, Курбуһах, Майаҕас, Мындааба, Сыырдаах, Суотту, Тумул, Түүлээх
Уһун Күөл, Хомустаах, Хоноҕор, Чэриктэй бибилэтиэкэрдэрэ көхтөөх кыттыыны ыллылар.

Дьыктаан 10 сорудахтан турар. Онтон тоҕуһа тургутук быһыытынан бэриллибит уонна бэриллибит тиэмэҕэ үөрэнээччи өйтөн суруйуута көрүлүннэ.

Түмүккэ дьыктаан үс бөлөҕүнэн сыаналанна.

• 3 — 4 кылаас үөрэнээччилэрин ортотугар кыайыылааҕынан Арина Неустроева таҕыста. Кини Мүрү 1 №-дээх орто оскуолатын 4 «А» кылааһын үөрэнээччитэ.
• 5 — 6 кылаас үөрэнээччилэрин икки ардыларыгар кыайыылаах аатын Саша Гоголев ылла. Мүрү1 №- дээх орто оскуолатын 5 «В» кылааһыгар үөрэнэр.
• 7 — 8 кылаас үөрэнээччилэрин ортолоругар Мүрү 1 №-дээх орто оскуолатын 8 «А» кылааһын үөрэнээччитэ Сааскылаана Гаврильева кыайда.                                          Кыайыылаахтары эҕэрдэлиибит, инникитин ситиһиилэри баҕарабыт. Сылын аайы ыытыллар «Таптыыр сахам тылынан…» өрөспүүбүлүкэтээҕи дьыктаан тэрээһинигэр кыттыыны ылбыт учууталларга, бибилэтиэкэрдэргэ махталбытын тиэрдэбит. Төрөөбүт төрүт тылбытын харыстыах, сахалыы ыраастык саҥарыах!

Надеэда Гоголева

Бороҕон, Уус Алдан.

Хаартыска: ааптар тиксэриитэ