Тар — саха төрүт аһа

 Муус устар 10 күнүгэр «Муус хайа» эрэстэрээн киэҥ саалатыгар бэрт үгүс киһи тар туһунан кэпсэтиигэ  муһунна.

Бастаан Виктория Петровна Павлова («Уйгулаах ас» ) кэлбит дьону турукка киллэрэн уоскутан, налытан, ыраастаныы оҥорон, кылгас киирии тылынан арыйан, «Алгыс от» уһуйааччыта Екатерина Прокопьевна Копыринаҕа тар туһунан сиһилии кэпсииригэр тылы биэрдэ.

Екатерина Копырина  экраҥҥа таблицалары туһанан,  тары былыр сахалар хайдах астыылларыттан саҕалаан,  бэрт киэҥ ис хоһоонноох бэсиэдэни оҥордо. Биирдиилээн ыйытыыларга чопчу эппиэттэри биэрдэ. Бэсиэдэ быыһыгар кэлбит дьоҥҥо хас биирдиилэригэр тар амсатан,  бэс киистэтинэн, отон арааһынан от чэйи хайдах оҥостон иһиэххэ сөбүн туһунан кэпсии-ипсии саламааттаах лэппиэскэнэн күндүлээтилэр. Сэрии саҕана үгүс дьону абыраабыт бэс сутукатын хайдах аска туттарга сүбэ-ама биэрдилэр.

Ити курдук, саха биир ураты төрүт аһын — тары оҥорууга төннүүгэ бэрт сэргэх тэрээһин  буолла. Манна кэлбит ыал ийэлэрэ, эбэлэрэ, аҕалара, эһэлэрэ саха аһын амсайан, сорохтор тар туһунан саҥа сиһилии биллибит диэн махтанан тарҕастылар.

    Августина ВЛАДИМИРОВА-ХАБАРОВА