Оскуолаҕа таракаан булуллубут чахчытынан бэрэбиэркэ ыытылынна

Социальнай ситимнэринэн тарҕаммыт видеонан бэрэбиэркэ түмүгүн таһаардылар. Бу туһунан СӨ Борокуратууратын пресс-сулууспата иһитиннэрэр.

Ол курдук, Дьокуускай куорат борокуратуурата Роспотребнадзор исписэлиистэрин кытта киин куорат 10 №-дээх оскуолатыгар санитарнай-эпидемиологическай сокуону кэһии тахсыбыт чахчытын бэрэбиэркэлээтилэр.

Үөрэх тэрилтэтигэр оҕолору иитиигэ уонна үөрэтиигэ санитарнай-эпидемиологическай ирдэбиллэр тутуһуллубатахтара билиннэ, ону кытта оскуолаҕа уонна остолобуойга таракаан булулунна.

Борокуратуура Д.Г. Новопашин аатынан 10 №-дээх орто оскуола дириэктэригэр административнай буруйу оҥоруу уонна санитарнай-эпидемиологическай сокуону кэһии дьыалатын арыйда.

Борокуруор аахталара көрүүгэ уонна хонтуруолга сылдьаллар. Бэрэбиэркэ кэмигэр үөрэх тэрилтэтигэр дезинсекция уонна дератизация ыытылынна.