«Тарат» кэпэрэтиип сайылыгар уот киллэриигэ көмө көрдүүр

Бүгүн Мэҥэ Хаҥалас улууһугар экэниэмикэ миниистирэ Петр Попов салайааччылаах үс бөлөх СӨ судаарыстыбаннай былааһын толорор уорганнарын ааспыт сыллаҕы отчуотун тэрээһиннээхтик ыытар.

Ол курдук, бүгүн иккис бөлөх Араҥас нэһилиэгэр кэллэ. Бу Тарат сэлиэнньэтигэр 200-тэн тахса быыбардааччы олорор. «Почетный старейшина РС(Я)» бэлиэнэн Николай Абрамовка, Евдокия Цыпандинаҕа, СӨ үөрэххэ уонна наукаҕа министиэристибэтин махтал суругун иитээччи Анна Авксентьеваҕа үөрүүлээх быһыыга өрөспүүбүлүкэ бырамыысыланнаска, геологияҕа миниистирин бастакы солбуйааччы Михаил Кириллин туттарда. Олохтоохтор Саха сирин сайдыытын туһунан видеоролигы сэргээн көрдүлэр.

Олохтоох дьокутаат Николай Бочкарев оскуола тутуутун туруоруста. Уонна уһуйаан дьиэтэ эргэрбитин эттэ. Уһуйааннара, кырдьык, хаарбах туруктаах диэн улуус баһылыгын солбуйааччы Василий Филиппов бигэргэттэ. Биэлсэр суоҕа атахтаабыт, онон сэрэдэҕэ эрэ кэлэн көрөн бараллар эбит. Өссө сиэстэрэ наада, укуол ыла барарга Төҥүлүгэ таксинан биэс мөһөөҕү төлүүллэр эбит. Эмчиттэр тиийбэт кыһалҕата Маттаҕа эмиэ дьэҥкэтик көһүннэ.

Гаас киирбит нэһилиэгэр уһуйааннарын таас чоҕунан оттуллар хочуолунайа саахалланар туруктаах. «Тарат» кэпэрэтиип бэрэссэдээтэлэ Петр Петров сайылыгар уот киириитин туруорсар, онно 22 мөл. солк. тахса үп наада.

Кини үлэлииргэ үчүгэй усулуобуйалаах хотону тутар баҕалаах.

Улуустааҕы уот ситимин начаалынньыга Станислав Оконешников кэпэрэтиип сайылыкка уоту киллэрии боппуруоһугар маннык хоруйдаата:

— Уот РФ Бырабыыталыстыбатын уурааҕынан холбонор. Биһиги уокка холбооһун сыанатын быспаппыт. РФ Бырабыыталыстыбата быһаарар. Онно Судаарыстыбаннай Дуума дьокутааттара үлэлэһиэхтэрин сөп. Эбэтэр ити сайылыкка уоту киллэриигитин биир эмэ бырагыраамаҕа киллэттэрдэххитинэ көмөлөөх буолуон сөп.

Нэһилиэнньэ уокка күнүскү, түүҥҥү тарыыпка көһөрүүнү туруорсар. Араҥас олохтоохторо ити курдук долгуйар кыһалҕаларын оруннаахтык туруорустулар.