“Тараттар” оттууллар, хотон туттараллар

Мэҥэ Хаҥалас улууһугар “Тарат” кэпэрэтиип улуус атын хаһаайыстыбаларын курдук, окко киирбитэ.

Билиҥҥи туругунан, 40 т оттоохтор. От үүнүүтэ алааска мөлтөх дииллэр. Бэттиэмэ үүммүт, хата. Билигин “Тулагы” диэн алааска бааллар. Уопсайа түөрт отчут, түөрт тыраахтар үлэлииллэр. Итинтэн икки тыраахтар охсор. Оттуур сирдэрэ кырыымчык, кыараҕас, онон мобильнай биригээдэ тэрийэн, өрүскэ оттуу киириэхтэрин баҕараллар. Дьон киирбэт сирин булан. Олохтоох дьаһалтаттан 60-ча гектардаах сири ылан оттууллар. Маһын эҥин ыраастаабыттар. Күрүө тутуохтара.

— Быйыл саҥа хотон тута сылдьабыт. “Северстрой” тэрилтэ тутар. Хотоммут 120 төбөҕө диэн аналлаах. Автопоилкалаах эҥин, быһата механизациялаах. Үлэһиттэргэ анаммыт толору хааччыллыылаах дууштаах, туалеттаах буолуохтаах. Балаҕан ыйын бүтүүтэ, быһата, алтынньы саҥатыгар үлэҕэ киирэрэ буоллар, бэрт буолуо этэ, — диир “Тарат” кэпэрэтип салайааччыта Петр Петров.