Таро – саҥа муода дуо?

Ааспыт сайын биир чугастык билсэр киһим “үлэбиттэн уурайдым, таролог буоллум” диэн кэпсээбитэ. Быраас идэтигэр уонча сыл үөрэнэн, араас куурустарга такыллан, өр сылларга балыыһаҕа үлэлээн баран, аны кэлэн “хаартыһыт, сэрэбиэйдьит буолбут” диэн соһуйбут киһи үгүс этэ.

Таро туһунан мин да истибитим син быданнаата, ол эрээри тоҕо эрэ көр-нар, оонньуу курдук ылынар этим. Кырдьык да, кэнники сылларга сэрэбиэй бу көрүҥэ киэҥник тарҕанна, дьон сэҥээриитин ылла. Тугун, ханныгын быһаарсан көрүөххэ.

ТУОХ ХААРТЫТАЙ?

Таро холуодатыгар 78 хаарты баар. Хас биирдии хаарты суолталаах, тугу эмит кэпсиир. Араастаан сэрэбиэйдэниэххэ сөп: ыйытыыга хоруй, инникини билии, тахсыбыт балаһыанньаны быһаарыы уо.д.а.

Бу хаарты быһа холоон 15-с үйэҕэ Италияҕа үөдүйбүт. Бастаан оонньууга туһанаары толкуйдаабыттар, онтон кэлин 18-с үйэ диэки сэрэбиэй­дэнэр буолбуттар. Бу кэмҥэ Европаҕа эзотерика араас көрүҥнэригэр, сэрэбиэйгэ итэҕэ­йии тарҕаммыт. Онтон быстах кэмҥэ сүтэ сылдьыбыт, этэргэ дылы, биир-икки киһи эрэ күүскэ үлүһүйэр буолбут. Салгыы интэриниэт үйэтэ сайдан, дьон бу хаарты нөҥүө харчылаһыахха сөп диэн өйдөөн, таро “су­­лустаах чааһа” иккис­тээн күөрэйэн кэлбит.

САҤА МУОДА ДУУ?

2021 сылга «Вайлдберриз» диэн интэриниэт-маҕаһыыҥҥа таро хаартытын атыыта 486% үрдээбит, билигин даҕаны үрдүү турар үһү. Оттон онлайн-куурустарга үөрэниэн баҕалаахтар ахсааннара сыллата 19 төгүл элбээн иһэр диэн суруналыыс Ольга Карасева биир ыстатыйатыгар ырытан суруйбут. Бэл, бырааһын­ньыктарга бу хаартынан сэрэбиэйдэнэр, быһа эпииргэ инникигин торумнуур, интэриниэккэ блог арынар буолбуттар. Москваҕа биир чааскы кофе сакаастаатаххына босхо сэрэбиэйдээн биэрэр кафе баар.

Маассабай “таролааһыны” бопсон, Госдуума дьокутаата Виталий Милонов хаарты атыытын тохтоторго уонна сэрэбиэйдьиттэри хонтуруоллуурга этии киллэрэ сылдьыбыта.
Бу курдук таро аныгы олохпутугар кимэн киирбит, дьон-сэргэ интэриэһин тарпыт эбит. Баҕар, быстах кэмҥэ кэлэн ааһар эмиэ тренд дуу, муода дуу буолуо дуу?

САХА СИРИГЭР

Саха сиригэр таронан үлүһүйээччи дьон ахсаана элбэх эбит. Биир биллэр саайтка киирэн көрдөөбүппэр, сүүрбэччэ аат кэчигирэһэ түстэ. Инники ааттаммыт дьон аккауннарыгар киирэн үөрэттим. Маныаха биири бэлиэтиэм этэ, биир даҕаны эр киһи таролог суох, барыта дьахтар аймах эбит.

“Биир консуль­тация иһигэр кыһал­ҕаҕын быһаарарга көмөлөһөбүн. Түргэнник уонна көдьүүстээх гына үлэлиибин. Мин өҥөбүн биллэр бэлиитиктэр, урбаанньыттар туһаналлар. Сүбэ-ама биэрэбин,” – диэн бэйэлэрин туһунан суруналлар эбит. Прайс ортотунан балтараа тыһыынча солкуобайтан саҕаланар.

Маны ааһан, сөпкө сэрэбиэй быраҕарга эмиэ үөрэтэллэр. Орто сыана – 10 тыһыынча солкуобай. Сыана бу эйгэҕэ төһө уопуттаах, билии­лээх-көрүүлээх киһиэхэ үөрэнэргиттэн халбаҥныан сөп.

ДЬОН САНААТА

Таролог өҥөтүгэр наадыйбат (итэҕэйбэт эбитэ дуу?) буоламмын, дьүөгэлэрбиттэн сурастым. Хата, биир кыыһым интэриэһиргиир, хаста да сэрэбиэйдэтэ сылдьыбыт эбит.
“Былырыын үлэбин ыарыр­ҕатан, дьиэ кэргэммэр өйдөспөт буолан, доруобуйам туруга мөлтөөн, кыһалҕалана сылдьыбыппын өйдүүрүҥ буолуо. Ол кэмҥэ интэриниэт хаһа олороммун биир биллэр блогер реклама таһаарбытын көрбүтүм, “делаю таро-расклад” диэн суруйан баран төлөпүөн нүөмэрин хаалларбыт этэ. Мин “эрэл кыыма бүтэһигин умуллар” диэн бараммын, өр толкуйдаабакка эрэ ол нүөмэргэ эрийбитим. Төлөпүөнү эдэр кыыс ылбыта. Тугу билиэхпин баҕарарбын кылгастык кэпсээтим.

Онуоха кыыс “төлөбүргүн ыыт, сэрэбиэй быраҕан бараммын,  барытын суруйан ыытыам” диэбитэ. Чаас даҕаны кэтэһиннэрбэккэ, төлөпүөммэр иһитиннэрии тирилээн кэлбитэ. Билигин мин олохпор, ис турукпар туох буола турарын уонна өссө миигин туох күүтэрин, бу балаһыанньаҕа хайдах буолуохтааҕым туһунан уһуннук да уһуннук суруллубут этэ. Аахпытым уонна отой да умнан кэбиспиппин. Бу билигин кэлэн санаатахха, улахаҥҥа уурбатах, итэҕэйбэтэх да эбиппин. Арай, быйыл олоҕум орун оннугар түспүтүн кэнниттэн, ону саныы биэрэн булан ылан аахтым. Бастаан утаа соһуйбута-өмүрбүтэ буоллум, таролог эппитэ барыта туолбут диэн.
Онтон уоскуйан олорон толкуйдаабытым, киһи олоҕор барыта куһаҕан эрэ буолбат, син биир хараҥа кэнниттэн сырдык кэлэрин курдук, барыта эргийэ турар буоллаҕа.

Ыарырҕатар үлэбиттэн бэйэм уурайан, арыый бэйэбэр сөп түбэһэр тэрилтэҕэ көспүтүм, кэргэмминээн өйдөспүппүт, доруобуйабын көрүнэн эмтэммитим. Кырдьык да, барыта бэйэбиттэн эрэ тутулук­таах кыһалҕалар эбит. Ол таролог хаартынан сэрэбиэйдээбэтэҕэ да буоллар, син биир барыта этэҥҥэ буолуо эбит ээ. Санааҕа, кыһалҕаҕа ыллара сылдьар кэммэр киирэн биэрбиппин быһыылаах”, – диэн дьүөгэм эмиэ да сонньуйан, эмиэ да үөрэн туран кэпсээбитэ.

ОЧЧОТУГАР?

Сөбө суох балаһыанньаҕа түбэспит киһи араас хаартыга, сэрэбиэйгэ олоҕун соҥнообокко, бэйэтэ сөптөөх быһаарыныылары ылыныахтаах, барыта этэҥҥэ буоларыгар үлэлиэхтээх-хамсыахтаах, туруулаһыахтаах буоллаҕа диэн саныыбын.

Сэрэбиэй бу көрүҥэр – тароҕа киһи итэҕэйэрэ эбэтэр итэҕэйбэтэ бэйэтин көҥүлэ буолар. Сороҕор киһи олоҕор туораттан сүбэ-ама эмиэ наада курдук буолааччы. Бу кэмҥэ таронан сэрэбиэйдэтэн, киһи көмөлөһүннэриэн эмиэ сөп.