Тас дойдуга тахсыыга гражданство бэлиэтэ. Ол тугуй?

Сайын саҕаланна да, кый ыраах олорор дьон быһыытынан ханна эрэ ичигэс сиргэ күүлэйдии барыах баҕа санааҥ тэһэ кэйэр. Ол эрээри, тустаах сокуоҥҥа туох уларыйыылар  киирэн иһэллэрин эрдэттэн билиэххэ наада.

Саҥа сокуон

Саҥа сокуон ылыллыаҕыттан 14 сааһын туола илик оҕо сибидиэ­тэлистибэтигэр Арассыыйа гражданстволааҕын бигэргэтэр бэлиэ (отметка) ирдэнэр буолла. Ону тас дойдуга тахсарга уонна Арассыыйа устун чэпчэтиилээх билиэтинэн көтөргө ирдииллэр. Бэлиэни Миграция боппуруостарын быһаарар подразделениеҕа, уруккунан паспортнай остуолга, туруораллар.  Дьокуускайга Миграция боппуруос­тарын быһаарар подразделение билигин Чайковскай уул. 2/2 №-гэр саҥардыы көһөн кэлбитэ.

МАНЫ БОЛҔОМТОҔО ЫЛЫАХХА

– Оҕоҕун эбэтэр сиэҥҥин кытта чэпчэтиилээх авиабилиэти атыылаһаргар, агентстволар оҕо гражданствотын бигэргэтэр бэлиэлээх сыһыарыыны көрдүүллэр. 

– Чэпчэтиилээх билиэтэ суох Арас­­сыыйа иһигэр айанныырга оҕоҕо бэлиэлээх сыһыарыы  ирдэммэт.

– Миграция боппуруостарын быһаарар подразделениеҕа тыын­наах уочаракка туран, сайабылыанньа биэрэҕин. Төрөппүттэр пааспардара, оҕо сибидиэтэлистибэтэ баар буолуохтаах.

– Оҕону эпэкииҥҥэ ылбыт буол­лаххына, ол докумуоннара барыта наадалар.

– Сорох төрөппүттэр ханнык эрэ биричиинэнэн оҕолорун аатын пааспардарыгар киллэрбэккэ хаалаллар. Штамп турбатах буолар. Дьэ оннук түгэҥҥэ оҕото 14 сааһын туола илик буоллаҕына, төрөппүт ити сайабылыанньаны Миграция боппуруос­тарын быһаарар подразделениеҕа кэлэн хайаан да биэриэхтээх уонна оҕото Арассыыйа гражданстволаа­ҕын туоһулуур бэлиэлээх  сыһыарыыны ылыахтаах. Бу кэлин пааспар ыларыгар син биир ирдэнэр. Пааспарын ылбыт 14 сааһын ааспыт оҕоҕо ити сыһыарыы ирдэммэт. 

– Сайабылыанньа бланкатын МВД.ру киирэн эбэтэр Чайковскай уулуссатын 2/2 №-гэр кэлэн, куар-куо­дунан киирэн хачайдаан ылан, эрдэттэн барытын толорон кэлиэххэ сөп.

Күҥҥэ сүүстүүнү

Билигин Арассыыйа гражданство­лааҕын бигэргэтэр бэлиэни туруоруу хайдах-туох бара турарын Миграционнай боппуруостары быһаарар салаа начаалынньыга Нюргуяна Аталлароваттан ыйыталаспыппытыгар:  “2023 сыл алтынньы 28 күнүгэр “О гражданстве Российской Федерации” саҥа федеральнай сокуон киирбитэ. Бу сокуон балаһыанньатынан, 14 сааһын туола илик оҕо гражданствота төрөөбүтүн туһунан сибидиэтэлистибэтигэр турбут бэлиэнэн бигэргэнэр. Бу бэлиэни туруортарарга төрөппүттэр пааспардарын, оҕо төрөөбүтүн туһунан сибидиэтэлистибэни аҕалаллар, оччоҕо биһиги 5 хонук иһигэр оҥорон биэрэбит.

Биһиги эрэгийиэммитигэр сибидиэтэлистибэ нууччалыы-сахалыы толоруллар буолан, судаарыстыбаннай докумуону буортулуур бырааппыт суох. Ол иһин бэлиэни сибидиэтэлистибэҕэ бэйэтигэр буолбакка, туспа сыһыарыыга туруоран биэрэбит. Оттон биир тылынан толоруллар атын эрэгийиэннэргэ бэлиэни сибидиэтэлистибэ кэннигэр туруораллар. Итиннэ биири тоһоҕолоон бэлиэтиибин, бу бэлиэ биирдэ туруоруллар. Бүгүн ийэтэ, сарсын аҕата кэлэн туруор­тарбаттар.

Бу сыл тохсунньуттан ыла 9 тыһыынчаттан тахса сибидиэтэлистибэҕэ бэлиэ туруордубут, күҥҥэ сүүстэн тахсалыыны. Үлэһиттэрбит күннэри-түүннэри үлэлииллэр. Ол курдук күн сарсын эбэтэр өйүүн көтөр  билиэттэрин тута сылдьар дьон  кэлэр, кинилэргэ, туох кыалларынан, көмөлөһөбүт. Ити бэрэбиэркэни ыытар дьоҥҥо улахан ноҕоруус­ка буоларын умнумуохха наада. Онон чэпчэтиилээх билиэтинэн туһанар дьон оҕоҕутугар, сиэҥҥитигэр эрдэттэн гражданствотын бигэргэтэр бэлиэлээх сыһыарыыны ыла тураргыт наада. Күһүөрү арыый холкутуйар инибит диэн эрэллээхпит. Улуустарга олорор дьон бэйэлэрин улуустарыгар баар Миграция боппуруостарын быһаарар подразделениеларга туруортараллар. Оттон хайа эрэ биричиинэнэн улууска бырапыыс­калаах, ол эрээри куоракка үлэлиир дьон, эбэтэр улуустарыгар оҥоттороллор эбэтэр куоракка быстах бырапыыс­каланаллар.

Хас биирдии гражданин төрүөҕүттэн гражданствота чуолкай буолуох­таах. Ол иһин оҕо төрөөтө даҕаны, төрөппүттэр гражданство бэлиэтин ха­­йаан да туруор­тарыахтаахтар. Ол ха­­йаан да ханна эрэ айанныырга наадаттан эрэ буолбатах, сокуон быһыытынан хас биирдии киһи төрүөҕүттэн гражданствота быһаарыллыбыт буолуохтаах», – диэн быһааран биэрдэ.

Татьяна, куорат олохтооҕо:

– Уолум пааспарын ыларыгар гражданствотын бигэргэтэр бэлиэ хайаан да наада диэтилэр. Онтуката суох пааспарын биэрбэттэр эбит.

Ольга, куорат олохтооҕо:

– Биһиги бу күннэргэ эрэ биллибит, тас дойдуга тахсарга Арассыыйа гражданстволааҕын бигэргэтэр бэлиэ наадатын. Сүүрэн кэлбиппит, 100-чэкэ киһилээх уочарат турар. Аны оҕом аҕатын кытта арахсыбыппыт ыраатта. Эмиэ да арахсыбыппытын туоһулуур сибидиэтэлистибэ баар буоллаҕына, аҕатын өттүн толорор наадата суох дииллэр. Оннук эрэ буоллун, оҕом аҕата билигин ханна баарын хантан билиэмий. Ыксыыр дьоҥҥо моһол буолла, хаарыаны эрдэттэн билбиппит эбитэ буоллар. Арассыыйа да иһигэр айанныырга ылыахха наада, бэрэбиэркэҕэ ханна, туох санаалаах киһи турара биллибэт. Гражданствоҕыт бэлиэтэ ханнаный диэн эмискэ ирдээн туруо дии, онон хааччына сылдьар ордук.

Бэлиэлээх сыһыарыыны Мигра­ция боппуруостарын быһаарар подразделение биэрэр, Дьокуускай Чайковскай уул. 2/2 №-гэр көһөн үлэлиир.