Тас дойдуга төрүүр дьахталлары Ийэ хапытаалыттан матарыахтара дуо?

Госдуума дьокутаата Виталий Милонов кыраныысса таһыгар төрүү барар, атын дойду гражданствотын ылар дьахталлары Ийэ хапытаалыттан уонна да атын көмөттөн матарар туһунан этии киллэрэн, мөккүөрү таһаарда. Кини этиитин спикер Вячеслав Володин өйөөтө.

2022 сылга 10,5 тыһыынчаттан тахса хат дьахтар аҥаардас Аргентинаҕа тахсан төрөөбүт. Онно «право почвы» диэн баар эбит, ол эбэтэр ханна төрөөбүккүнэн гражданство биэрэллэр.

Ол эрээри, Кириэмилгэ дьокутааттар этиилэрин ырыппаттар. Бэрэсидьиэн пресс-сэкирэтээрэ Дмитрий Песков этэринэн, бу боппуруоһу болҕомтоҕо ылбатахтар.

Оттон “Биир ньыгыл Арассыыйа” дьокутаата Виталий Милонов этэринэн, “Биллэн турар, дьахтар ханна баҕарар баран төрүүрэ көҥүл, ол эрээри, биһиги судаарыстыбабыт бэйэтин ийэлэригэр көмөлөһөр, оттон дьахтар Аргентина ийэтэ буолбут буоллаҕына, киниэхэ Аргентина көмөлөстүн” диир. Оччотугар кыраныысса таһыгар тахсан төрүөхтэрин баҕалаахтар ахсааннара аҕыйыа этэ диэн сабаҕалыыр.

Кини кыраныысса тас өттүгэр төрүү барар дьахталлары “социальнай эппиэтинэһэ суох кууруссалар” диэн ааттаан, мөккүөр быатын тоҕо тарпыта.