Татаар киинэлэрин күннэрэ саҕаланнылар

Федеральнай Сабантуй чэрчитинэн Дьокуускайга Татаар киинэтин күннэрэ саҕаланнылар.

Бэс ыйын 12 күнүгэр Киинэ күннэрэ үөрүүлээх быһыыга-майгыга арылыннылар. Татарстан Өрөспүүбүлүкэтиттэн кэлбит ыалдьыттары уонна киинэ көрөөччүлэри СӨ култуураҕа уонна духуобунай сайдыыга миниистири солбуйааччы Марина Силина эҕэрдэлээтэ, татаар норуотун култууратын кытары билсиһиинэн, бүгүҥҥү ардах мээнэҕэ буолбатаҕын, ыалдьыттары алгыстаабытын курдук ылынарбытын туһунан үөрэ-көтө бэлиэтээтэ уонна татаар култууратын билсэргэ ыҥырда.

Сыанаҕа киинэ продюсера, «Татаркино» култуура тэрилтэтин дириэктэрэ Миляуша Айтуганова уонна «Гора влюбленных» киинэ режиссера Салават Юзеев таҕыстылар. Ыалдьыттар СӨ Култуураҕа уонна духуобунай сайдыыга министиэристибэтигэр федеральнай Сабантуй өйдөбүнньүк бэлэҕин (мерч) туттардылар.
Миляуша Айтуганова Саха сирин кинематографистарын кытары истиҥ сыһыаннаахтарын, бииргэ үлэлэһэллэрин уонна саха киинэтин устааччылартан элбэххэ үөрэнэллэрин, холбоһуктаах бырайыак туһунан толкуйдуулларын туһунан эттэ.

Салават Юзеев: «Мин Саха сиригэр аан бастаан өссө сэбиэскэй кэм саҕана кэлэ сылдьыбытым. Онтон «Курбан-роман» диэн киинэбинэн бэстибээлгэ кыттыбытым. Билигин көрдөрөр саҥа киинэм икки эдэр киһи киһини долгутар устуоруйата. Аҕа дойду Улуу сэриитэ кинилэр дьылҕаларын уларытар, онтон 60 сыл буолан баран тапталлааҕын көрсө дойдутугар айанныыр», -– диэн киинэ туһунан кылгастык билиһиннэрдэ.

Онтон «Я приду» киинэ режиссера Булат Сабитов Саха сиригэр аан бастаан уонна бастакы киинэтинэн кэллэ. Кини: «Биһиги киинэбит дойдуга барытыгар бэстибээллэргэ кыттар, ону тэҥэ атырдьах ыйыгар киэҥ быракаакка, ол иһигэр Саха сиригэр, тахсыаҕар эрэнэбит», -– диэтэ.
Бу күн ыалдьыттарбыт нууччалыы тылынан субтитрдаах «Гора влюбленных» киинэни көрдөрдүлэр.
Киинэ кэнниттэн ким да туран барбакка, бары тугу эрэ күүппүттүү иһийэн олордулар. Ол да иһин, Миляуша Айтуганова: «Ким да туран барбатыгыт. Ол аата, биһиги киинэбит эһиги дууһаҕыт кылын таарыйдаҕа. Бу киинэ кэккэ бэстибээлэргэ «бастыҥ режиссер», «бастыҥ сценарист» уонна «бастыҥ артыыска» бирииһи ылбыта. Киинэ Мароккаҕа, Малайзияҕа көрдөрүллүбүтэ. Хас биирдии киһи таптал хайалаах. Ол эрэн киинэҕэ таптал эрэ туһунан көрдөрүллүбэтэ. Аҕалар уонна оҕолор өйдөспөт буолуулара эмиэ тыктарыллар. Уопсайынан,  биһиги олох сыаннастарын, дьон дьылҕатын нөҥүө омукпут уратытын, социальнай олоҕу көрдөрөр киинэлэри устуохпутун баҕарабыт. Киинэни көрөн баран, көрөөччү  туохтан эрэ долгуйуохтаах, толкуйдуохтаах. Ол суох буоллаҕына, киинэ устар да наадата суох. Барыгытыгар махтал!».
Оттон режиссер Салават Юзеев  бу киинэтин суруйааччы аҕата 1970-с сылларга  суруйбут  сэһэнинэн устубутун бэлиэтээтэ.

Бэс ыйын 13 күнүгэр күнүс 16.00 чаастан «Немая кукушка» уонна 18.00 чаастан «Я приду» киинэлэр көстүөхтэрэ.