Татарстаан киин куоратыгар «Саха сирин күндү баайа. Казань – 2025» быыстапка арылынна

ЮНЕСКО Аан дойдутааҕы нэһилиэстибэтин эбийиэгэр – Казанскай кириэмилгэ «Саха сирин күндү баайа. Казань-2025» көһө сылдьар быыстапка арылынна.

Экспозиция 2021 сыллаахха баттаммыт Саха Өрөспүүбүлүкэтин уонна Татарстаан Өрөспүүбүлүкэтин Бырабыыталыстыбаларын икки ардыларынааҕы бииргэ үлэлэһии туһунан сөбүлэһиини олоххо киллэрии чэрчитинэн тэрилиннэ. Быыстапка икки өрөспүүбүлүкэ култуурунай-гуманитарнай алтыһыыларын салгыытынан буолла. Онно Саха Өрөспүүбүлүкэтин Күндү баайын судаарыстыбаннай түмэлин уонна Емельян Ярославскай аатынан Хотугу норуоттар устуоруйаларын уонна култуураларын Дьокуускайдааҕы судаарыстыбаннай холбоһуктаах түмэлин пуондаларыттан 80-тан тахса ураты эспэнээт туруорулунна.

Тэрээһин арыллыытыгар СӨ Ил Дархана Айсен Николаев, Татарстаан Өрөспүүбүлүкэтин премьер-миниистирэ Алексей Песошин, Татарстаан Өрөспүүбүлүкэтин премьер-миниистирин солбуйааччы – бырамыысыланнас уонна эргиэн миниистирэ Олег Коробченко уонна Татарстаан Өрөспүүбүлүкэтин култуураҕа миниистирэ Ирада Аюпова кыттыыны ыллылар.

Айсен Николаев эҕэрдэ тылыгар быыстапка Саха сирин уонна Татарстаан култуурунай ситимнэрэ сайдыыларын чаҕылхай холобура буолбутун бэлиэтээтэ. «Бүгүн биһиги Казань куоракка элбэх омуктаах норуоппут устуоруйатын, култууратын уонна дууһатын көрдөрөр ураты эспэнээттэрбитин аҕаллыбыт. Эһиэхэ Сахабыт сирин бэлиэлэрин – сэдэх киэргэллэри, декоративнай-прикладной ускуустуба айымньыларын уонна ураты ааттаах алмаастары көрдөрөрбүтүттэн үөрэбит. Эспэнээттэрбит быыстарыгар Татарскай АССР тэриллибитэ 100 сылыгар анаммыт таас ураты миэстэни ылар. Алмаас хаһан баҕарар күүһү уонна үйэлээҕи кэрэһэлиир. Оттон бу таас – биһиги Татарстаан устуоруйатыгар уонна ситиһиилэригэр, улуу Арассыыйа сайдыытыгар киллэрбит сүдү кылаатыгар ураты ытыктабылбыт бэлиэтэ буолар», — диэтэ Айсен Николаев.

Быыстапка ыалдьыттарга бөдөҥ айылҕа алмаастарынан, көмүс, платина, үрүҥ көмүс самородоктарынан эрэ буолбакка, саха маастардарын – ювелирдар, муос уонна таас кыһааччылар оҥоһуктарынан билиһиннэрэр. Эспэнээттэр истэригэр байыаннай дьайыы кыттыылаахтара – Арассыыйа Дьоруойдарын ааттарынан ааттаммыт алмаастар, ону таһынан сэдэх саха самоцветтара: чароит, хромдиопсид уонна дианит бааллар. Татарстаан премьер-миниистирэ Алексей Песошин бырайыак култуурунай атастаһыы саҥа кирбиилэрин арыйарын бэлиэтээтэ уонна Саха сирин уонна Татарстааны, аныгы технологиялары уонна инновациялары сайыннаран туран, национальнай култуураны харыстыырга дьулуурдара сомоҕолуур диэн эттэ.

«Бу быыстапка — Татарстаан олохтоохторугар уонна ыалдьыттарыгар Саха сирин дьикти эйгэтигэр уонна баай нэһилиэстибэтигэр чугаһыырга, кэрэ ускуустуба айымньыларын көрөргө үтүө кыаҕынан буолар. Ураты эспэнээттэр хотугу дойду  баайын уонна кэрэтин көрдөрөллөр, ону таһынан биһиги норуоттарбыт доҕордоһууларын бөҕөргөтөллөр», — диэн бэлиэтээтэ кини. Үөрүүлээх сиэр-туом чэрчитинэн «Казанскай Кириэмил» түмэл-заповедник уонна Саха Өрөспүүбүлүкэтин Күндү баайын судаарыстыбаннай түмэлин икки ардыларыгар бииргэ үлэлэһии туһунан сөбүлэһиини баттааһын эмиэ буолла. «Саха сирин күндү баайа. Казань-2025» быыстапка биир ый устата үлэлиэҕэ.