Татарстааҥҥа төрөөбүт тылы уонна култуураны чөл хаалларыыга Саха сирин уопутун туһаналлар

Дьокуускайга бу күннэргэ Татарстаантан дэлэгээссийэ кэлэн үлэлии сылдьар. Үлэлиир бөлөх Саха сиригэр тылы, култуураны, үгэһи чөл хаалларыыга судаарыстыбаннай бэлиитикэ ыытар үлэтин сэҥээрбит. Бу уопуту Татарстааҥҥа туһаныахпыт диэн эппиттэр. Ити туһунан ЯСИА иһитиннэрэр.

“Бэҕэһээҥҥи көрсүһүүлэри өйбүтүгэр-санаабытыгар илдьэ сылдьабыт. Манна төрөөбүт тыл боппуруоһа национальнай идиэйэ таһымыгар турар. Биһиги көрсүбүт дьоммут бу кыһалҕаны, соругу дириҥник өйдүүллэр. Биһиги норуоттарбытыгар глобализация, дьүөрэлэһии өтө киирбит буолан, мин маны кыһалҕа диэн этэбин. Ол гынан баран, Саха сиригэр былаас, уопсастыбаннас, нэһилиэнньэ бэйэлэрин төрүт духуобунай үгэстэригэр, бэйэлэрин төрөөбүт  тылларыгар олус эппиэтинэстээхтик сыһыаннаһаллар эбит,” – диэн Татарстан Судаарыстыбаннай сэбиэтин бэрэссэдээтэлин солбуйааччы Марат Ахметов Ил Түмэҥҥэ суруналыыстар ыйытыыларыгар хоруйдууругар эппит.

Кини Дьокуускай куорат уһуйааныгар сылдьан сөхпүтүн, хас биирдии миэтэрэ төрүт култуураҕа аналлааҕын ыйбыт.

“Тэлэбиисэринэн хампаанньа үлэтэ эмиэ сөхтөрдө. Биһиги духуобунаһы, төрөөбүт тылы чөл хаалларыыга анимацияҕа үлэ, ураты бырайыак, бырагыраама чааһыгар  улаханнык хаалан иһэбит” – диэн кини бэлиэтээбитин ЯСИА суруйар.

Санаа атастаһыытыгар Марат Ахметов Саха сирин бары институттара, уопсастыбанньыктара судаарыстыбаннай тылы сайыннарыыга көдьүүстээхтик үлэлииллэрин ыйбыт.

“Марат Ахметов тылы чөл хаалларыы өрөспүүбүлүкэҕэ төрүт идиэйэнэн буолбут диэн бэлиэтиир. Көрсүһүү кыттыылаахтара бырааттыы өрөспүүбүлүкэлэр ийэ тыл үтүө туруктаныытын уонна төрөөбүт тылынан үөрэҕи сайыннарыы боппуруостарыгар салгыы бииргэ үлэлэһэр, уопут атастаһар ирдэнэрин туһунан эттилэр” – диэн “Сахамедиа” генеральнай дириэктэрин солбуйааччы, СӨ бырабыыталыстыбатыгар тиэрмин хамыыһыйатын чилиэнэ, тэрээһиҥҥэ кыттыбыт Чокуур Гаврильев санаатын үллэстэр.