Татарстантан – “Таптал хайата”

Дьокуускайга Федеральнай Сабантуй чэрчитинэн сэргэх тэрээһиннэр буола тураллар. Бэҕэһээ киинэ тыйаатырыгар “Таптал хайата киинэ” буолла.

Ол туһунан Дьокуускай олохтооҕо Августина Владимирова санаатын маннык үллэһиннэ:

— “Таптал хайата” киинэни төрдүс эрээт ортотугар олорон, отой иһигэр киирэн абылаппыттыы көрдүм. Хайдах эрэ киинэни көрө олорор курдук буолбакка, сэһэни ааҕа олорор курдук ис куппунан киирэн хааллым. Өтөрүнэн  киинэни маннык турукка киирэн көрбөтөх курдук сананным. Тыла-өһө да хайдах эрэ сахалыы курдук. Сүрүн дьоруойдар — тыа сирин кулуубугар кэнсиэргэ кыыс ыллыыр, уол баяҥҥа оонньуур. Онно ырыа бүппүтүгэр отой сценаҕа көрөөччү курдук сананан ытыспын таһыммыппар  дьүөгэм ойоҕоско анньан тохтоотум. Тахсан баран күлсүү бөҕөтө буоллубут.

Киинэ бүтүүтэ эдэр уоллаах кыыс эр киһиттэн таптал хайатын ыйдараллар. Ону көрөн эмискэ ити уол аны байыаннай дьайыыга барара буолуо диэн долгуйан ыллым. Бүгүҥҥү олоххо баар курдук олус күүстээх санааны этэр киинэ эбит дии санаатым.