Татьяна Кардашевская: «Күүс-көмө, өйөбүл буоларга бэлэммит»

“Сахабыт сирин дьоно-сэргэтэ биир бигэ баҕалаахпыт: уолаттарбыт кыайан-хотон, дойдуларыгар этэҥҥэ эргиллэн кэлэллэрэ. Ол туһугар биһиги инникитин да улууспутугар буолар бары тэрээһиннэргэ күүс-көмө, өйөбүл буоларга бэлэммит”, — диир Саха Өрөспүүбүлүкэтин Бырабыыталыстыбатын иһинэн Гражданнар туруктарын аахтатын суруйар Үөһээ Бүлүү оройуонунааҕы салаатын салайааччыта Татьяна Кардашевская.

— Байыаннай эпэрээссийэ биллэриллиэҕиттэн Үөһээ Бүлүү улууһун саахса отделыгар элбэх боппуруостар уонна сайабылыанньалар киирбиттэрэ уонна киирэ тураллар. Биһиги, саахса үлэһиттэрэ, байыаннай эпэрээссийэҕэ быстах ыҥырыынан уонна бэйэ баҕатынан кытта, ытык иэстэрин төлүү барар дьоннорбутугар, дьиэ кэргэннэригэр уонна оҕолоругар аҕа, эр-ойох буолуу докумуоннарын суһаллык толоро олоробут. Быстах ыҥырыынан барбыт саллааттар дьиэ кэргэттэрэ судаарыстыбаттан көрүллүбүт материальнай көмөнү түргэнник ылалларын туһугар Үлэ министиэристибэтин кытта ыкса үлэлиибит.

ДНӨ Кировскай куоратын чөлгө түһэриигэ үбүнэн көмөлөһүүгэ өрөспүүбүлүкэбит салалтатын көҕүлээһинин уонна СӨ Бырабыыталыстыбатын иһинэн Гражданскай турук аахтатын управлениетын идэлээх сойууһун баҕа өттүнэн байыаннай эпэрээссийэҕэ барааччыларга наадалаах малы-салы хомуйарга аһымал аахсыйаны өйөөн, өрөспүүбүлүкэ үрдүнэн ыытыллар «Үтүө санаа харыйата» үгэскэ кубулуйбут аахсыйаҕа кыттан, байыаннай дьайыыга сылдьааччы оҕотугар бэлэх оҥорон туттарбытым.

Ону тэҥэ улууспутугар байыаннай эпэрээссийэҕэ барбыт уонна барар дьоммутугар наадалаах тустаах көмөлөр, тэрээһиннэр ыытылла тураллар. Ол курдук, улууспутугар быстах ыҥырыынан сулууспалыы сылдьар дьоммутун өйүүр сыалтан анал пуонда тэриллибитэ.

Сахабыт сирин дьоно-сэргэтэ биир бигэ баҕалаахпыт: уолаттарбыт кыайан-хотон, дойдуларыгар этэҥҥэ эргиллэн кэлэллэрэ. Ол туһугар биһиги инникитин да улууспутугар буолар бары тэрээһиннэргэ күүс-көмө, өйөбүл буоларга бэлэммит.