Национальнай бибилэтиэкэҕэ Татьяна Ларионова уһулуччулаах бэлэҕи оҥордо

Бүгүн Төрөөбүт тыл уонна сурук-бичик күнүгэр саха тыллаах бүттүүнэ сахалыы таҥас кэтэн, бэйэ-бэйэтин сайдам тылынан ууруйдуур-айхаллыыр. «Тыла суох – норуот суох» диэн бэргэн этии баар. Ол сиэринэн, биһиги тылбыт баай, этигэн, хомоҕой, онон норуот быһыытынан өлөн-охтон биэрбэт буоларга дьулуһуохтаахпыт. Онуоха саха тылынан суруллубут кинигэлэрбит, хаһыаттарбыт, сурунаалларбыт сүтэн, симэлийэн хаалбатыгар улахан оруоллаахтар.  

Бүгүн Төрөөбүт тыл уонна сурук-бичик күнүгэр сөп түбэһиннэрэн, Национальнай бибилэтиэкэҕэ биир эмиэ бэлиэ түгэн буолан ааста.

Өлүөхүмэ улууһуттан кэлбит музей үлэһитэ, историк Татьяна Михайловна Ларионова 1958 с. тахсыбыт Е.К. Пекарскай «Саха тылын тылдьыта» кинигэни Национальнай бибилэтиэкэҕэ бэлэхтээтэ.

Тылдьыт Саха АССР норуотун хаһаайыстыбатын бочуоттаах үлэһитэ уонна Өлүөхүмэ улууһун бастакы Бочуоттаах олохтооҕо Ефрем Иванович Кузьмин тус архыыбыттан бэриллибит.

Ефрем Иванович 1929 сыллаахха 25 саастааҕар Өлүөхүмэ оройуонун исполкомун бэрэссэдээтэлинэн анаммыт уонна дьаныардаах үлэтинэн түргэнник үрдээн, 1934 сыллаахха өрөспүүбүлүкэ доруобуйатын харыстабылын наркомунан буолбут. Ол гынан баран, кини дьылҕата ыар тыыннаах репрессия кэмигэр тосту уларыйбыта: 1938 сыллаахха тутуллан, үспүйүөннээһиҥҥэ буруйданан хаайыллыбыта.

Ефрем Иванович онно Платон Ойуунускайы кытары биир камераҕа олорбуттара уонна кинини тыыннааҕын бүтэһигин көрбүт дьонтон биирдэстэринэн буолар. 1941 с. босхолонон баран, эмиэ үлэҕэ көхтөөхтүк кыттыспыта, фроҥҥа барбыта. Сэрииттэн төннөн кэлэн төрөөбүт дойдутун туһугар салгыы үлэлээбитэ. Ол эрээри, хомойуох иһин, билигин даҕаны официальнайдык реабилитациялыы иликтэр.

Татьяна Ларионова биир дойдулааҕын үтүө аатын төнүннэрэргэ дьулуһар.

Татьяна Ларионова хаартыскалары тиксэрдэ.