Татьяна Олесова: «Кыайыы кынаттаах этэҥҥэ эргиллэллэригэр баҕа улахан»

Байыаннай эпэрээссийэҕэ кыттар Ньурба сириттэн барбыт дьонҥо, кинилэр дьиэ кэргэттэригэр оройуон оҥорор өйөбүлүн, көмөтүн туһунан Ньурба улууһун бэтэрээннэрин Сэбиэттэрин бэрэссэдээтэлэ Татьяна Прокопьевна Олесова кэпсээтэ. Кини Ньурба дьоно-сэргэтэ ханнык баҕарар суолталаах кэмҥэ буоларын курдук, дойдуга тирээбит балаһыанньаны киэҥник өйдөөн көмөлөһөллөрүн, үтүө санаанан күүс-көмө, өйөбүл буолалларын, быстах ыҥырыынан барбыт дьону сэргэ улуус ыччаттарын ортотуттан Ийэ дойдуга суоһуур кутталы туоратыыга үтүө баҕа өттүнэн баран инники кирбиигэ хорсуннук кытта сылдьалларын бэлиэтиир.
— Быстах хомуурга барбыт дьонҥо улуустан көмөнү оҥорууга сонно тута хара бастаанҥытттан хамыыһыйа тэриллэн, көмө оҥоһуллан барбыта. Хас биирдии дьиэ кэргэҥҥэ куратордар, психологтар сыһыарылланнар, билигин үлэ тэрээһиннээхтик бара турар.
Ол курдук хас биирдии саллаакка таҥастарыгар, эпикировкаҕа диэн 80-нуу тыһ. солкуобайынан көмөлөһөн, уопсайа, 142 киһиэхэ 13 мөл.солк. (13 057 468 солк.) суумалаах көмө Ньурба оройуонун дьаһалтатын нөҥүө оҥоһуллубута. Кинилэр дьиэ кэргэттэригэр хас биирдиилэригэр 30-туу тыһыынча солкуобайдаах көмө оҥоһуллан, уопсайа, 142 ыалга 4 551 756 солк. суумалаах көмөнү сэргэ араас төлөбүрдэргэ диэн өҥөҕө көмө оҥоһуллубута. Маны таһынан нэһилиэк баһылыктара, олохтоохтор, тэрилтэлэр, волонтёрдар, ыччаттар кыстыкка отунан, маһынан, мууһунан, чоҕунан, иһэр уунан хааччыйан, тиэйэн-таһан биэрдилэр. Ол курдук, 63 ыалга муус ыллылар, 58 ыалга мас бэлэмнээн тиэйэн, хайытан биэрдилэр, 18 ыал араас үлэҕэ көмөлөһүннэрдилэр, 51 ыалга бородууктанан көмө оҥордулар.
Саҥа дьылы көрсө 130 оҕоҕо «Үтүө дьыала харыйата» диэн аахсыйаҕа кыттан, дьиэлэринэн бэлэх тиэрдилиннэ. Мобилизованнай дьон кэргэттэригэр дастабырыанньа оҥоһуллубута. Онон сир учаастагын нолуогуттан босхолонорго, Ньурбаҕа АТП тэрилтэ тырааныспарыгар босхо сылдьалларыгар кыах бэрилиннэ. Култуура тэрилтэлэригэр кэнсиэртэргэ, испэктээхтэргэ, түмэллэргэ босхо сылдьыы, мэдиссиинэ тэрилтэлэригэр уочарата суох анаалыстары туттарыы, көрдөрүү, үлэҕэ киирээччи мэдиссиинэ көрүүтүн босхо ааһыыта тэрилиннэ. Оҕо саадыгар сылдьыы иһин саллаат оҕото төлөбүртэн босхолонуута олоххо киирдэ.
Оройуон көхтөөх ийэлэрэ, эбээлэрэ саллааттарга аналлаах таҥас, экипировка арааһын тигэн, наадалаах туттар малы-салы, гуманитарнай көмөнү оҥорон ыыталыы тураллар. Улууспут анал дьаһалынан бигэргэммит балаһыанньаҕа олоҕуран, “Аһымал санаа пуондата” тэриллэн үлэлиир. Онно билинҥи туругунан 3 710 429 с. 047 харчы хомуллан үлэлии турар. Ньурба дьоно-сэргэтэ ханнык баҕарар суолталаах кэмҥэ буоларын курдук, киэҥник өйдөөн көмөлөһөллөр, үтүө санаанан күүс-көмө, өйөбүл буолаллар. Нэһилиэнньэ улуустан барбыт дьон кыайыы кынаттаах этэҥҥэ эргиллэн кэлэригэр баҕата улахан.