Татьяна Павлова Бүлүү бөлөх эмчиттэриниин көрүстэ

Доруобуйа харыстабылын миниистирин солбуйааччы Татьяна Павлова Бүлүү улууһугар сырыытын түмүгэр “Табыгастаах уонна хаачыстыбалаах мэдиссиинэ көмөтүнэн хааччыйыы”  улуустар икки ардыларынааҕы кэмпириэнсийэ үлэтигэр кытынна.

Ньурбаҕа оройуоннааҕы киин балыыһа быраастара, биэлсэрдэрэ уонна акушеркалара эрэ буолбакка, ыраах сытар учаастактар эмиэ видео-кэмпириэнсийэҕэ холбоннулар.

Миниистири солбуйааччы Татьяна Павлова  уонна Бүлүү бөлөх улуустарын оройуоннааҕы киин балыыһаларын кылаабынай быраастара муниципальнай тэриллиилэргэ мэдиссиинэ көмөтүн хаачыстыбатын уонна табыгастаах буоларын хааччыйарга ыытыллар үлэлэри билиһиннэрдилэр.

Ону сэргэ,  учаастактааҕы педиатр үлэтин тэрийии, ыарыыны сэрэтэр дьаһаллар боппуруостарын, киин балыыһалар учаастактары, амбулаториялары, балыыһалары кытары үлэлэрин дьүүллэстилэр. Бастакы сүһүөх звено быраастара маннык тэрээһиннэр, чуолаан кэмпириэнсийэлэр,  ыытыллаллара наадатын уонна улахан суолталааҕын бэлиэтээтилэр.