Төгүрүк остуолга байыастарга, кинилэр дьиэ кэргэттэригэр көмөнү дьүүллэстилэр

Дьокуускайга «Норуот уонна аармыйа — биир сомоҕо» III өрөспүүбүлүкэтээҕи фашизмы утары пуорум чэрчитинэн байыаннай-бэлитиичэскэй үлэҕэ Илиҥҥи байыаннай уокурук сэриилэрин командующайын солбуйааччы Роман Греков салалтатынан улуустар баһылыктара, ситэриилээх былаас уорганнарын салайааччылара, федеральнай биэдэмистибэлэр бэрэстэбиитэллэрэ кыттыылаах төгүрүк остуол буолла.

“Билигин өрөспүүбүлүкэҕэ байыастары уонна кинлэр дьиэ кэргэттэригэр аналлаах 44 өйөбүл  көрүҥэ үлэлиир. Ону таһынан Москваҕа, Дьокуускайга сураҕа суох сүппүттэр, сэрии хонуутугар охтубуттар дьиэ кэргэттэригэр, билиэҥҥэ түбэһэн юридическай көмөҕө наадыйааччыларга анаан   суһал өйөбүл кииннэрэ үлэлииллэр. Байыаннай дьайыы буола турар сиригэр гуманитарнай көмө тиһигин быспакка бара турар”, — диэн эттэ СӨ Бырабыыталыстыбатын бэрэссэдээтэлэ Кирилл Бычков.

Илиҥҥи байыаннай уокурук сэриилэрин командующайын солбуйааччы Роман Греков байыаннай балаһыанньаны иһитиннэрдэ итиэннэ Саха сирэ тиэрдэр тиэхиньикэтэ, чуолаан “Сокол” квадроцикл, оннооҕу сиргэ-уокка сылдьарга табыгастааҕын махтанан туран иһитиннэрдэ.

Төгүрүк остуол кыттыылаахтара байыастарга, кинилэр дьиэ кэргэттэригэр көмө бары көрүҥүн, социальнай адаптацияны, мэдиссиинискэй-психологическай реабилитацияны, бэтэрээннэри  дьиэнэн хааччыйыыны, үөрэх бырагырааматынан, юридическай өттүнэн көмөлөһүүнү, о.д.а. боппуруостары дьүүллэстилэр.