Төхтүр диэки оҥочо түҥнэстибит

Бэҕэһээ, бэс ыйын 4 күнүгэр, 22:30 чааска 112 нүөмэргэ эрийэн, Өлүөнэ өрүскэ Төхтүр сэлиэнньэтин диэки оҥочо түҥнэстибитин туһунан иһитиннэрбиттэр. Эр дьон суһаллык көмөҕө наадыйбыттарын туһунан СӨ Быыһыыр сулууспата суруйар.

Быыһыыр сулууспа икки быыһааччыта Максим Колесов салалтатынан быһылаан буолбут сиригэр тиийбиттэр. Барыллаан дааннайдарынан, эр дьон Жатайтан Аллараа Бэстээххэ диэри оҥочонон устан иһэн, Төхтүр диэки суудуналара түҥнэстибит. Эмсэҕэлээччилэртэн биирдэстэрэ кытылга тахсан, Быыһыыр сулууспаҕа төлөпүөннээн тиийбит. Ол кэмҥэ иккис эр киһи мастартан тутуһан ууга хаалбыт.

«Хата, суотабай сибээс хабар сиригэр сылдьыбыттар уонна төлөпүөннэригэр уу киирбэтэх. Эр дьон чуолкай ханан бааллара биллибэт этэ, онон көрдүүргэ күһэллибиппит. Бастаан ууга хаалбыт эр киһини булбуппут. Кини үөттэри токурутан, онно сыппыт. Тоҥмут аҕай этэ. Онтон иккис эр киһини ылан, иккиэннэрин Жатайга илдьибиппит», — диэн быыһааччы Максим Колесов кэпсээбит.

Эмсэҕэлээччилэр туруктара этэҥҥэ, госпитализацияттан уонна мэдиссиинэ көмөтүттэн аккаастаммыттар.

Уу эбийиэктэригэр буруйу оҥорууну уонна быһылааны тахсыытын сэрэтэр, туоратар сыалтан, барыбыттан болҕомтолоох буолуу ирдэнэр. Уу эбийиэктэригэр куттал суох буолуута – биһиги барыбыт уопсай эппиэтинэспит. Бэйэбит уонна чугас дьоммут олохторун, доруобуйаларын харыстыыр туһугар, бары ирдэбиллэри тутуһан, сэрэхтээх буолуоҕуҥ! Этэҥҥэ сылдьыҥ!