Төхтүр орто оскуолатыгар “Дзюдо оскуолата” бырайыак үлэлээтэ

Бэҕэһээ, алтынньы 25 күнүгэр, И.М. Романов аатынан Төхтүр орто оскуолатыгар өрөспүүбүлүкэҕэ биир бастакынан Бүтүн Арассыыйатааҕы «Дзюдо оскуолата» бырайыак үлэтин саҕалыыр үөрүүлээх күнэ буолла.

Бырайыак сүрүн сыала — оскуола оҕолорун дзюдо көрүҥэр үөрэтиигэ уонна кэнчээри ыччаты дойдуга бэриниилээх буолууга туһуланар, эт-хаан, өй-санаа өттүнэн иитии буолар.

Тэрээһин үөрүүлээх чааһыгар Арассыыйаҕа дзюдо Федерациятын вице-бэрэсидьиэнэ Валентин Хабиров эҕэрдэ ыыппытын иһиттилэр, СӨ Тутууга миниистирэ, өрөспүүбүлүкэҕэ дзюдо Федерациятын салайааччыта Виктор Романов, улуус баһылыга Дмитрий Тихонов, Ил Түмэн дьокутаата Андрей Находкин, улуустааҕы үөрэҕирии салалтатын салайааччыта Гаврил Толстяков, нэһилиэк баһылыгын солбуйааччы Петр Куркутов, оскуола дириэктэрэ Николай Романов эҕэрдэ тылларын эттилэр, кэлэктиипкэ, оҕолорго үрдүк ситиһиилэри баҕаран туран бэлэхтэри туттардылар.