122 “Итии лииньийэ” салайааччыта байыаннай дьайыы кыттыылаахтарын эбэтэр кинилэр оҕолорун төлөбүрдээх үөрэхтэн босхоҕо көһөрүү бэрээдэгин быһаарда.
Бу быһа лиииньийэ суукканы эргиччи үлэлиир. 2024 сыл тохсунньу 1 күнүттэн кулун тутар 10 күнүгэр диэри 6113-тэ төлөпүөннээбиттэр. Билигин хантараак түһэрсиитин, байыаннай госпиталларга бааһырбыттарга көмө, дьиэ кэргэни өйөөһүн, уоппускалаахтарга авиабилиэти уурдарыы, ону тэҥэ Саха сирин үөрэх кыһаларыгар төлөбүрдээх үөрэхтэн босхоҕо көһөрүүгэ сыһыаннаах боппуруостар киирэллэр.
Бүгүн бу туһунан эрэгийиэннээҕи линия салайааччыта Мария Винокурова кэпсээтэ.
Кини 2013 сыл бэс ыйын 6 күнүгэр РФ Үөрэххэ уонна наукаҕа министиэристибэтин “Об утверждении Порядка и случаев перехода лиц, обучающихся по образовательным программам среднего профессионального и высшего образования, с платного обучения на бесплатное” 443 №-дээх бирикээһэ ылыныллыбытын бэлиэтээтэ.
“Бу бирикээс 2024 сыл атырдьах ыйын 31 күнүгэр диэри туһаныллар. Сайабылыанньаны биэрбит кэмнэригэр академическай иэһэ, үөрэх төлөбүрүгэр иэһэ суох байыаннай дьайыы кыттыылаахтара вакантнай бүддьүөт миэстэлэригэр көһөрүллэллэр”, — диэн кэпсээтэ салайааччы.
Мария Винокурова быһаарбытынан, байыаннай дьайыы кыттыылааҕа вакантнай бүддьүөт миэстэтигэр көһүөн баҕардаҕына, үөрэнэр сиригэр көһөрөр туһунан сайабылыанньаны уонна бу дьайыыга кыттыбытын туһунан докумуону үөрэх тэрилтэтин салайааччытыгар биэрэр.
Кини этэринэн, Украина, Донецкай Норуодунай Өрөспүүбүлүкэ, Луганскай Норуодунай Өрөспүүбүлүкэ, Запорожскай уобалас уонна Херсонскай уобалас сиригэр байыаннай дьайыыга кыттар уонна кыттыбыт дьон оҕолоро, төлөбүрдээх үөрэх туһунан дуогабарга олоҕуран, үөрэнээччилэр сайабылыанньаны биэрбит кэмнэригэр академическай иэһэ, бэрээдэк өттүнэн сэмэтэ, үөрэҕин төлөбүрүгэр иэһэ суохтар төлөбүрдээх үөрэхтэн босхоҕо көһөрөр бырааптаахтар.
Бу РФ Үөрэххэ уонна наукаҕа министиэристибэтин “Об утверждении Порядка и случаев перехода лиц, обучающихся по образовательным программам среднего профессионального и высшего образования, с платного обучения на бесплатное” 2013 сыл бэс ыйын 6 күнүнээҕи бирикээһин 6 пуунун “б” хос пуунугар олоҕурар. Онон көһүөн баҕалаах киһи үөрэх тэрилтэтин салайааччытыгар сайабылыанньа суруйуохтаах.
Төлөбүрдээхтэн босхоҕо көһөрөр туһунан быһаарыыны үөрэх тэрилтэтин хамыыһыйата үөрэх тэрилтэтин үөрэнээччилэрин сэбиэтин, идэлээх сойууһун уонна төрөппүттэр сэбиэттэрин (сокуоннай бэрэстэбиитэллэрин) санааларын истэн баран ылынар. Хамыыыһыйа састаабын, боломуочуйатын уонна үлэтин бэрээдэгин үөрэх тэрилтэтэ бэйэтэ быһаарар.
Хамыыһыйа быһаарыыта иһитиннэрэр-телекоммуникационнай ситимнэргэ тахсар, ол иһигэр “Интэриниэт” ситиминэн үөрэх тэрилтэтин дьиҥ таһымнаах саайтыгар.
“Төлөбүрдээхтэн босхо үөрэниигэ көһүү үөрэх тэрилтэтин дьаһайар аахтатынан толоруллар, ону үөрэх тэрилтэтин салайааччыта эбэтэр кини боломуочуйалаабыт киһитэ хамыыһыйа маннык көһөрөргө диэн быһаарыы ылыммыт күнүттэн 10 күн иһинэн”, — диэн санаатын үллэһиннэ 122 “Итии лииньийэ” эрэгийиэннээҕи салайааччыта Мария Винокурова.
Бу лииньийэҕэ байыаннай дьайыы уонна быстах хомуур боппуруостарынан 122 нүөмэргэ 3 (хантараагынан сулууспа), 4 (байыаннай дьайыы боппуруостарынан) диэн эбии кунуопкалары баттаан тиийиэххэ сөп. Атын эрэгийиэннэртэн Саха сирин олохтоохторо маннык төлөпүөнүнэн эрийэллэр: 8(4112) 510-122. Суукканы эргиччи үлэлиир.
СӨ Ил Дарханын уонна Бырабыыталыстыбатын пресс-сулууспата
Ил Дархан Айсен Николаев Алдан оройуонун баһылыгын Александр Шестопаловы кытта көрүстэ. Кэпсэтии кэмигэр өрүттэр муниципалитет…
Бүтүн Арассыыйатааҕы "Улахан этнографическай дьыктаан" сырдатар аахсыйа сэтинньи 1-8 күннэригэр буолуоҕа. Быйыл онус төгүлүн ыытыллар…
РФ бырабыыталыстыбата Тиксии-Найба агломерациятын социальнай-экэнэмиичэскэй сайдыытын кэлим уһун болдьохтоох былаанын бигэргэттэ. Кэлим былаан биир суолталаах…
Бүгүн хара сарсыардаттан, харахпытын хайа тардыахпытыттан социальнай ситимнэринэн, мессенджеринэн: “Эбээ, эһээ” күнүнэн диэн араас хартыыналары,…
Тэрээһин оҕолор олохторун уонна доруобуйаларын харыстыырга, уустук олохтоох дьиэ кэргэттэри буларга уонна оҕону атаҕастааһын түбэлтэлэрин…
Сэтинньи саҥатыгар бырааһынньык күннэрэ түбэһэллэринэн, оҕо босуобуйалара эрдэ түһүөхтэрэ диэн Социальнай пуонда Саха сиринээҕи салаата…