Төлөпүөн атыылаһан баран харчытын төлөөбөтөх

Дьокуускай куоракка  полиция 3 нүөмэрдээх отделыгар 100 тыһ. солкуобайдаах суотабай төлөпүөнүн  уордарбыт киһиттэн  сайабылыанньа киирбит. Бу туһунан ИДьМ куораттааҕы салаатын пресс-сулууспата иһитиннэрдэ.

Суһал-ирдиир үлэ кэмигэр холуобунай ирдэбил үлэһиттэрэ уорууга уорбаланар урут сууттана сылдьыбыт 31 саастаах киһини туппуттар.

Быһаарыллыбытынан, уорбаланааччы  мобильнай төлөпүөн атыытын диэн  биллэриини бэлиэтии көрбүт. Эр киһи төлөпүөнү атыылыыр киһини  сирэй көрсөн кэпсэтэн, төлөпүөнү ылан баран,  харчытын счетка ыытыам диэн эрэннэрбит.  Эмсэҕэлээччи итэҕэйэн төлөпүөнү биэрбит, ол гынан баран төлөбүрэ ыйыллыбыт болдьоҕор счетка киирбэтэх. Инньэ гынан  полицияҕа сайабылыанньа киллэрбит.

Билигин уорбаланааччыга РФ Холуобунай кодексын 159 ыст. 2 ч. холуобунай дьыала   («Мошенничество») көбүтүллүбүт.