Төлөпүөнү ылыаҥ – харчыгыттан матыаҥ

Төлөпүөн түөкүттэрэ ньымаларын, албастарын уларытан, тупсаран иһэргэ кыһаналлар. Онуоха үгүс дьон куйаар ситимигэр куттала суох буолуу быраабылаларын билбэккэ, кинилэр угаайыларыгар чэпчэкитик киирэн биэрэллэр. 

Түөкүттэр билигин үксүгэр Иран, Турция, Сирия, о.д.а. дойдулар нүөмэрдэриттэн эрийэр буоллулар. Ол курдук, +985, +963, +903 куодтардаах нүөмэрдэртэн эрийэр буоллахтарына, ылымаҥ. Бу атын дойдуга баар түөкүттэр, куодтары, төлөпүөн нүөмэрдэрин анал бырагырааманан уларытар албастаахтар. Бэл диэтэр, Сбербаан “900” нүөмэриттэн эрийэр кыахтаахтар.

Суотабай хампаанньалар оператордара түөкүттэр төлүөпүөннэрин саба баттыы (блоктуу) сатыыллар, ол эрээри, атын дойдулар куодтарын сабар бырааптара суох. Ол иһин түөкүттэр бу албаһы туһаналлар.

Уопсайынан, атын эрэгийиэнтэн буолара биллэр, атын куодтаах, билбэт нүөмэртэн эрийиини ылбат ордук. Кэпсэттигит да, бэйэҕит да билбэкктинэн, угаайыга киирэн биэриэххитин сөп. Түөкүттэр да буолбатахтарын иһин, араас тэрилтэлэр эрэкэлээмэлэрэ буолуон сөп. Ону тэҥэ, социальнай ситимнэргэ кэлэр сигэлэри (ссылкалары) баттаамаҥ. Сороҕор, «мин оҕобор, сиэммэр куоластааҥ» диэн суруйуулар кэлэллэр. Түөкүттэр бу манныгы эмиэ туһаналлар. Сигэни баттаатыгат да, харчыгытыттан матыаххытын сөп.

Саха сирин төлөпүөннэрин куодтара: +914, +984 (“МТС”), +924 (“Мегафон”), +964 (“Билайн”), +999 (“Йота”). Сэрэхтээх буолуҥ!