Тэллэй кырдьыыны бытаардар

Арассыыйатааҕы Геронтологическай билим-клиническэй киин Сааһырыыны үөрэтэр үнүстүүтүн билим үлэһитэ Михаил Болков этэринэн, тэллэй эрготионеинынан, кырдьыыны бытаардар аминокислоталааҕынан баай.

Эрготионеин диэн айылҕа компонена, киһи организма оҥорбот. Сүрүн хаачыстыбата — организмы “көҥүл радикаллар” дэнэр куһаҕан дьайыылаах молекулалартан көмүскүүр уонна баспылыанньаны намтатар.

«Арассыыйа олохтоохторо тэллэйи үгэс оҥостор астарыгар киллэрэллэр, саҥа чинчийиилэр кини туһалааҕын көрдөрдүлэр. Бу эттиктэр лисичка, үрүҥ тэллэй, подберезовик, опята курдук тэллэйдэргэ баар», — диэн Болков эппитин “Известия” суруйар.

Ол гынан баран тэллэй бырамыысыланнас баар сиригэр буортулаах эттиктэрин мунньарын умнумуохха, киһи сиир уонна дьааттаах тэллэйи араара үөрэниэххэ наада. Болков этэринэн, кырдьыыны бытаардар саамай үчүгэй ньыманан — эт-хаан дьарыга уонна отонунан, күөх үүнээйинэн баай балансированнай аһылык буолар.

«Кырдьыыны бытаардар эттиктэр үксүн отоннорго уонна күөх үүнээйилэргэ бааллара билиннэ. Онон аһылыкка тэллэйи таһынан фрукта уонна оҕуруот аһа эмиэ баар буолуохтаах», — диэн түмүктээбит эспиэр.