Теннисчит оҕо

Оҕо сөбүлүүр дьарыгар төрөппүт сыһыана эмиэ оруоллаах буоллаҕына, ситиһии, табыллыы, кыайыы барыта кэлэр. Ити чаҕылхай холобурунан Дьокуускай куораттааҕы саха политехническай лиссиэй VI “Д” кылааһын үөрэнээччитэ Вадим Павлов уонна кини ийэтэ Екатерина Семеновна Павлова буолаллар.

Быйыл тохсунньу 17-18 күннэригэр “Дохсун” спорткомплекска спорт уонна үлэ ветерана, теннискэ РФ I категориялаах судьуйата, “Уус Алдан улууһун социальнай-экономическай сайдыытыгар кылаатын иһин” бэлиэ хаһаайына, “Азия оҕолоро” норуоттар икки ардыларынааҕы оонньуулар, остуол тенниһигэр Уһук Илин, Россия таһымнаах күрэхтэһиилэр судьуйалара, остуол тенниһин пропагандиһа Владимир Леонтьев сырдык кэриэһигэр өрөспүүбүлүкэтээҕи турнир 150 оҕону өрөспүүбүлүкэбит араас муннугуттан түмэ тарпыта. Онно 2013-2014 с. төрүөх уолаттар бастакы бөлөхтөрүгэр Вадим Павлов I миэстэни ылан, үөрүү өрөгөйүн билбитэ! Былырыын эмиэ бу турнирга Вадим I миэстэ буолары ситиспит эбит.

Биһиги Екатерина Павловалыын кэпсэтиибитин билсиҥ.

Бастакы дьарыктан кынаттанан

—Мин оҕом Вадим теннискэ түбэспиччэ кэлбитэ. Үлэлиир “Утум+” тэрилтэбэр саҥа спортсаала арыллан, онно чааһынай теннис кулууба тэриллэн, спорт маастарыгар кандидат Владислав Софронович Тимофеевка оҕом эрчиллэн саҕалаабыта. Бастакы дьарыгын олус сөбүлээн, устунан умсугуйан барбыта.  Дьиҥэ, бастаан баскетбол секциятыгар бараары сылдьыбыта.

Атын куораттарга сылдьан, үгүстүк алтыһан

—Оҕобор эчэйиитэ аҕыйах буолуон сөптөөх спорт көрүҥэ наада диэн саныырым. Ол санаам туолбутуттан ийэ быһыытынан үөрэбин, астынабын. Аны, теннис оскуолатыгар Кытайтан тренердэр кэлэн үөрэтэ сылдьыбыттара. Ол эмиэ оҕом тенниһинэн үлүһүйэригэр оруолу оонньоотоҕо. Оҕолорго да, төрөппүттэргэ да омук тренердэрэ, спортсменнара кыттыылаах эрчиллии сүрдээх интэриэһинэй, сэргэх буолар. Уопсайа Кытайга үс төгүл хомуур дьарыкка бара сырытта. Соторутааҕыта Бурятияҕа эмиэ хомуур түһүлгэҕэ кыттан кэлбитэ. Атын куораттарга сылдьан, оҕолору кытары ити курдук, үгүстүк алтыһар, доҕордоһор.

Теннисчит оҕолор уратылара

— Остуол тенниһинэн үлүһүйбүт, дьарыктанар оҕолор өйдөөх-төйдөөх буолаллар диэн көрөбүн. Ол курдук, теннисчит оҕолор ортолоругар үгүс гимназистар, туйгун да, үчүгэй үөрэхтээхтэр элбэхтэр. Бары иитиилээхтэр, эйэҕэстэр, мэлдьи дорооболоһо сылдьаллар. Онон спорт ситимнээн, элбэх доҕордоноллоро үчүгэй.

Спорт туохха үөрэтэрий?

—Спорт оҕону дьиссипилиинэлээх буоларга иитэр, такайар. Ол курдук, оҕом эрдэ утуйар, эрдэ турар, хойутаабат, эрчиллиилэри уонна күрэхтэһиилэри  көтүппэт. Үчүгэйдик аһыыр, графигы тутуһар. Төлөпүөҥҥэ таах оонньуу олоруохтааҕар, теннис туһунан уонна бэйэни сайыннарыы туһунан ханааллары булан умсугуйа көрөр.

Икки сыл дьарыктанан

—Билиҥҥи тренерэ Василий Иванович Румянцев, теннискэ сахалартан  бастакы РФ спордун маастара. Дьарыктарын Вадим наһаа сөбүлүүр. Эрдэттэн былааннанан дьарыктаналлар. Турнир, хомуур үгүс. Икки сылтан ордук кэм дьарыктанна уонна Уһук Илиҥҥи уокурук, өрөспүүбүлүкэ, куорат таһымнаах күрэхтэһиилэргэ ситиһиилэммитин туоһулуур отуттан тахса мэтээллээх. Онон тренердэрбитигэр Владислав Софроновичка, Василий Ивановичка махтанабыт.

Кыттыһан күүскэ үлэлииллэрэ буоллар, оҕо бөҕө сайдан тахсан иһиэ этэ. Саҥа дьарыктанааччы уонна хайыы-үйэ ситиһиилэммит оҕо таһымнара, кыахтара араастаһар, онон үөрэтии, иитии, такайыы ньымата эмиэ туспа буоллаҕа. Оҕом дьарыгар үлэлиир “Утум+” тэрилтэм өйөбүлүн иһин махтанабын!

Арай, үлэбитигэр спортсаала арыллыбатах буоллун? Биһиги олох атын көрүҥҥэ барыа эбиппит уонна остуол тенниһигэр дьоҕурдаахпытын билиэ да суох эбиппит.

Түгэнинэн туһанан, теннис спордун өйүүр, аҕаларын сырдык аатын үйэтитэр Владимир Леонтьев дьиэ кэргэнигэр, турниры   көҕүлүүр теннис Федерациятыгар барҕа махталбын биллэрэбин. Элбэх дьарык, күрэхтэһии, дьиссипилиинэ, сыал-сорук туруорунуу ситиһиигэ хайаан да тириэрдиэ диэн атын оҕолорго сүбэлиибин. Өрөспүүбүлүкэбит Уһук Илин үрдүнэн бастыҥ көрдөрүүлэниэн, Россия таһымыгар ким эмэ тахсыан  баҕарабыт.