Тэпилииссэттэн кууруссаҕа диэри босхо тиэйэн аҕалаллар

Нэһилиэкпитин сайыннарар үлэлэр Кэбээйи улууһун Сииттэтигэр тиһигин быспакка ыытыллаллар. Тэрилтэлэр бары улууска, өрөспүүбүлүкэҕэ буолар араас тэрээһиннэргэ көхтөөхтүк кытталлар.

Ол курдук, ханнык баҕарар нэһилиэккэ тиий, аан бастаан дьаһалта дьиэтигэр-уотугар киһи хараҕа быраҕыллар. Нэһилиэк олоҕун хамсатар сүрүн үлэ манна барарын быһыытынан, баһылык Семен Тимофеев саҥа сылга, бастатан туран, улахан болҕомтотун исписэлиистэр үлэлиир миэстэлэригэр уурда. Кини анал көмпүүтэрдэри, принтердэри, ону кытта офиснай миэбэли барытын саҥаттан уларытта. Онон кыргыттар мантан антах үлэлиэхпитин-хамсыахпытын эрэ наада диэн үөрүүлэрин үллэстэллэр.

Кырдьык, билигин дьаһалта үлэтэ олус эппиэтинэстээх, ханна да буоларын курдук бүддьүөт өттүгэр ыарахаттардаах. Ону ол диэбэккэ, суолу-ииһи баттаһа, бу күннэргэ уматык боппуруоһа быһаарыллыбыт. Аны билигин биир тыын боппуруоспутунан тутуу матырыйаала буолар. Нэһилиэк дьоно ботуччу соҕус сакаастаан олорор.  Сыл аайы нэһилиэкпит сүүстэн тахса кууруссаҕа сайаапка түһэрэр. Быйыл да итиччэни суруйтардылар. Ону таһынан сайын бэйэ сибиэһэй оҕуруот аһын олордор туһугар, бэлэм поликарбонат тэпилииссэлэргэ сайаапка хомулла турар. Бу барыта босхо аҕалыллар.

Нэһилиэк олоҕун уйгутун улаатыннарыы, усулуобуйатын тупсарыы — бу олохтоох  дьаһалта биир сүрүн үлэтэ, былаана буоларын бары билэбит. Онон дьаһалта үлэһиттэрэ кыахтара баарынан усулуобуйа тэрийэ сатыылларыттан, бу ыытыллар үлэ барыта нэһилиэк сайдыытыгар туһуланарыттан  олохтоохтор олус үөрэбит уонна астынабыт.

Марианна Сивцева.