Бүтүн Арассыыйаҕа биллэриллибит Кутурҕан күнүгэр, кулун тутар 24 күнүгэр, Дьокуускайга Кыайыы болуоссатыгар дьон-сэргэ кэлэр.
Бу Красногорскайга «Крокус Сити Холл» комплекска теракка суорума суолламмыт дьону кэриэстээн дьон-сэргэ, СӨ Бырабыыталыстыбатын чилиэннэрэ, куорат салалтата сибэкки дьөрбөтүн аҕалан уураллар.
«Саха сирин олохтоохторо мемориалга сибэкки дьөрбөтүн, оонньуурдары уураллар, кутурҕан тылларын суруйбуттарын хааллараллар. Дойдубут кутурҕанын үллэстибэт киһи диэн суох», — диэн суруйар бэйэтин ТГ-ханаалыгар Ил Дархан Айсен Николаев.
«Бу иэдээннээх түбэлтэ. Биллэн турар, сакаастаан оҥотторооччулар уонна буруйдаахтар эппиэттиэхтээхтэр. Бу иэдээн биһиги элбэх национальностаах дойдубутун иэстэһиигэ, кырыктыйыыга тиэрдиэ суохтаах. Бүгүн Саха сирэ бүттүүнэ кутурҕанын биллэрэр, Саха сирэ Москваны кытта, Москва уобалаһын кытта. Биһиги бу охсууну тулуйуохтаахпыт уонна кыайыахтаахпыт. Бу биһигини өссө күүскэ сомоҕолуур», — диэн этэр мемориалга сибэкки дьөрбөтүн ууран баран СӨ Бырабыыталыстыбатын Бэрэссэдээтэлин солбуйааччы Дмитрий Садовников.
33 № оскуола 4 «Д» кылааһын үөрэнээччитэ Володя ийэтин уонна быраатын кытары кэлбит.
«Туох да буруйа суох дьон, ол иһигэр оҕолор өлбүттэрэ иэдээн. Итинник буолуо суохтаах», — диир үөрэнээччи.
Дьокуускай куорат Думатын бэрэссэдээтэлин бастакы солбуйааччы Евдокия Евсикова дьулайымыахха, куттанымыахха наада диэн этэр. Маннык кэмҥэ өссө күүстээх буолуохтаахпытын, бииргэ буоллахпытына бары уустугу, ыараханы туоруохпутун бэлиэтиир.
«Кэнсиэри көрө, кэпсэтэ барбыт дьон өллүлэр. Оннук буолуо суохтаах! Итинник иэдээх хаһан да, ханна да буолуо суохтаах. Дьон дьоллоох буолуохтаах», — диир Сайсары уокуругун бэтэрээннэрин Сэбиэтин чилиэнэ Елена Пахомова.
Үөрэнээччилэрин кытта болуоссакка кэлбит 21 №-дээх оскуола дириэктэрин сүбэһитэ Гаврил Петров бары түмсүү сүдү күүс буоларын бэлиэтиир.
«Крокус Сити Холл» комплекска буолбут иэдээнинэн, кулун тутар 24 күнүгэр, Арассыыйаҕа Кутурҕан күнэ биллэриллибитэ. Бу туһунан РФ Бэрэсидьиэнэ Владимир Путин норуокка туһаайан этэригэр иһитиннэрбитэ.
СӨ Ил Дархана Айсен Николаев ыйааҕынан 2024 сыл кулун тутар 25 күнүгэр 00.00 ч. диэри өрөспүүбүлүкэ сиригэр-уотугар тэрээһиннэр ыытыллыбаттар.
Кулун тутар 22 күнүгэр Красногорскайга «Крокус Сити Холл» комплекска теракт түмүгэр 133 киһи өлбүтэ, 152 киһи эмсэҕэлээбитэ бэлиэтэнэр.
СӨ Ил Дарханын уонна Бырабыыталыстыбатын пресс-сулууспата
Хаартыскаҕа Мария Васильева түһэриит, СИА
Саҥа дьыл барахсан, оннук-маннык итэҕэллэргэ, кирдээх бэлиитикэҕэ умньамматах, соҕотох алыптаах, оҕотуттан оҕонньоругар тиийэ дуоһуйа, астына…
Саха сирэ хорсун-хоодуот дьонунан аатырар, дойду устуоруйатыгар элбэх дьоруойу бэлэхтээбитэ, олор истэригэр Аҕа дойду Улуу…
Ааспыт сууккаҕа Саха сиригэр буруйу оҥоруу сэттэ түбэлтэтэ тахсыбыт. Манан процессуальнай бэрэбиэркэни ыытыыны уонна холуобунай…
«Якутскэнерго» ПАУо өрөспүүбүлүкэ олоҕо-дьаһаҕа бигэ туруктаах буолуутугар уотунан-сылааһынан хааччыйар дьоһун суолталаах тэрилтэнэн буолар. Хампаанньа генеральнай…
Бүгүн, тохсунньу 11 күнүгэр, өрөспүүбүлүкэ соҕуруулуу-арҕаа, хотугулуу-илин, илин өттүгэр кыралаан хаардыаҕа. Киин, арҕаа оройуоннарга туманнаах…
Бүгүҥҥү күн – наҕыл, сымнаҕас уонна дьиэҕэ-уокка чугас дьону кытта сынньанарга табыгастаах кэм. Ый Оҕус…