Төрдүс, бэһис оҕоҕо Ийэ хапытаалын биэриэхтэрэ

Ил Дархан Айсен Николаев Анал этиитигэр оҕо төрөөһүнүн, демография боппуруостарын тумнубата.

— Иккис, үһүс оҕо төрөөтөҕүнэ, дьиэ кэргэттэр судаарыстыбаттан көмөнү ылаллар. Оттон 4-с уонна онтон кэлэр оҕо төрөөтөҕүнэ, көмө суох диэн төрөппүттэр миэхэ этээччилэр. Дьиҥэр, дьиэ кэргэн төрдүс, бэһис оҕону төрөтөргө быһаарыныы ылынара судургута суох ээ.

Онон төрдүс уонна онтон кэлэр оҕо төрөөтөҕүнэ, Өрөспүүбүлүкэтээҕи Ийэ хапытаалын эмиэ биэрэр буолуохпут. Эһиил суумата үрдүөҕэ, — диэн Айсен Николаев эттэ.

Онон Өрөспүүбүлүкэтээҕи Ийэ хапытаалын суумата 433 тыһыынча солкуобайга тэҥнэһиэҕэ.

Маны тэҥэ, 100 саастарын туолбут ытык кырдьаҕастарга »Үйэ саас» бэлиэни кытта бэриллэр суума 10 төгүл улаатан, 1 мөлүйүөн солкуобайга тэҥнэһиэҕэ диэн кини эттэ.