“Төрдүс бөрөм айаҕыттан ылларбыт”

Билигин өрөспүүбүлүкэ бөрөһүттэригэр эппиэттээх күннэр тураллар. Онон ханна төһө адьырҕа бултаммытын дьон ааҕа билэн олорор.

Илин эҥэр бөрөһүттэрин түмсүүтүн салайааччы Игнат Николаевич Егоров бэрт дьикти сонуну кэпсээтэ:

— Амма улууһун Болугурун бөрөһүтэ Георгий Филиппов быйылгы сезоҥҥа төрдүс бөрөтүн бултаата. Дьэ, интэриэһинэйдик туттарда. Ол курдук, бөрөтө хапкааҥҥа хаптаран баран, сыаба сөллөн, хапкааннаах эрэ барбыт. Ону булчут хайаан да хаһааммыт сиэннэригэр барыа диэн үчүгэйдик билэр эбит. Сэрэйбитин курдук, бөрө ол сиэнигэр тиийэн баран иккис хапкааҥҥа айаҕыттан хаптарбыт. Маннык түгэн урут буола илик этэ диэн бөрөһүттэр этэллэр.

Оттон сорсуннаах бөрөһүт Георгий Филиппов бэйэтэ хайдах бултаабытын туһунан “Саха сирэ” хаһыакка маннык кэпсээтэ:

— Быйыл төрдүс бөрөбүн ыллым. Төрдүс бөрөм айаҕыттан ылларбыт. Манна дэриэбинэ таһыгар 10-ча км сиргэ хайа үрдүттэн сууллараннар, кыыл табаны туппуттар этэ. Онно хапкаан ииппитим. Иккиэ этилэр. Биирдэрин үктэттим. Ол бөрөм Сыбааркалаабакка, сыабын карабинынан холбоон кэбиһэммин, ону тардыалаан-тардыалаан, сөллөн, хапкааннаах баран хаалбыт этэ. Дьэ, ону бураммынан эккирэттэҕим дии. Икки хонуктааҕыта барбыт буолан, суоллара кыраһалаах этэ. Таас атта үрэх диэки барбыттар этэ. Ону сарсыныгар оҥостон эккирэтэ бардым. Баҕар, сибиэһэй суолларын көрүөм диэн санаалааҕым. Онно тиийэн үрэх ортотугар буллум. Нөҥүө үрэҕи туораан куулаҕа барбыттар этэ. Үрүйэнэн тахсан, хайа диэки хайыспыттарын көрдүү сатаатым, суолларын буллум.  Онтон эмиэ сибиэһэй суолларын буллум, сиһи быһаллара хаалбыт этэ. Кулааһай сэмнэҕэ баар этэ. Кинилэр киэннэрэ эбит, эрдэтээҥи. Саҥа дьыл иннинэ онно баар диэн булчуттар эппиттэрэ. Онно иннилэригэр түһэн тиийэн, 3 хапкааны иитэн бардаҕым дии. Сарсыныгар аттыгар баар үүтээҥҥэ атынан эккирэтиннэрээри от илдьэ таһааран, бэрэбиэркэлээбитим. Ол түүн түбэспит эбит. Айаҕыттан хапкааннаах олороро. Туох да диэбит иһин, дьикти түбэлтэ буолбута. Алын сыҥааҕыттан ылларбыт этэ. “Урал” хапкааҥҥа. Аҥаар атаҕар хапкааннаах сырыттаҕа дии. Арааһа, онон үктээбит быһыылаах. Ол хапкаанын кытта охсуһаары айаҕынан түспүтэ хапкаана мүлчү баран, айаҕыттан ылларбыт быһыылаах диэн быһаардыбыт. Сыҥааҕыттан ылларан сыаба күүскэ баҕайы тардар эбит. Хапкаан дэлби өҕүллэн хаалбыт. Сыап этэ, чэҥкээйитинэн холбоноро. Төрдүс звенотунан аппайан хаалбыт этэ. Бу атыыр бөрө эбит. Иккиһэ тыһыта хааллаҕа. Үрүйэ баһыгар улуйар курдуга. Баҕар эмиэ киириэ, — диир тыаттан бу аҕай тоҥон-хатан кэлбит Георгий Сергеевич.

Булчут бөрө  ахсаанын сүрүннээһин лиссиэнсийэтэ биир ый буолбута үчүгэйин бэлиэтиир. Былырыын үс хонук эбит.

— Миэнэ 14 чыыһылаҕа туолуохтаах. Лиссиэнсийэбин толорон туттарабын, онтон атын лиссиэнсийэни биир ыйга ылыам. Бөрөнү бултуурга киһи элбэх сиргэ барытыгар саба сүүрэн сылдьар кыаҕа суох. Ону, хата, олохтоохтор тыаҕа онон-манан сылдьан көрөн, ыйан биэрэллэрэ көмөлөөх. “Онно бөрө суолун көрдүбүт, онно кулааһайы туппуттар, онно сылгыны тардыбыттар”, — диэн этэн абырыыллар. Оччоҕо кинилэр ыйбыт сирдэригэр чопчу тиийэҕин, — диэн кэпсээнин түмүктээтэ Георгий Филиппов.

Хаартыска: Г.Филиппов