Төрдүс миэстэ: кыһыылаах дуу, үөрүүлээх дуу?
![](https://sakha-sire.ru/wp-content/uploads/2024/07/vms_5917.jpg)
Икки нэдиэлэлээх дирбиэннээх-дарбааннаах VIII “Азия оҕолоро” Оонньуулар кэннилэриттэн туох санаа-оноо хаалла? Туох түмүктэри оҥоробут, кэлэр Оонньууларга хайдах бэлэмнэнэн тиийэбит? Успуорт эйгэтигэр, быһаччы Оонньуулар үллэр үөстэригэр сылдьыбыт тириэньэрдэр, салайааччылар хас биирдиилэрэ итиннэ түмүк оҥостунан эрэр буолуохтаахтар.
Быйылгы Оонньууларга Саха сирин хамаандата төрдүс миэстэни ылла. Үһүс миэстэ иһин тэҥ очукуолаах Беларусь уонна Москва хамаандаларын кытта волейболга киирсиэхтээхтэрэ. Киһи хайдах да мыыммат хамаандалара. Беларусь судаарыстыбатын бастакы нүөмэрдээх спортсменнарын уонна Арассыыйа курдук судаарыстыба киин куората туруорбут хамаандаларын кытта биһиги оҕолорбут киирсэр түгэннэрэ үөскээбитэ. Өй-санаа ыгыллар, эт-хаан күүрэр, үһүс миэстэни былдьаһар быһаарыылаах киирсиилэр…
1 №-дээх хамаандаҕа 245 оҕо, 2 №-дээх хамаандаҕа 125 оҕо киирбитэ. Күрэхтэһиилэр 24 көрүҥҥэ ыытыллыбыттара, 239 кэмпилиэк мэтээл оонньоммута.
![](https://sakha-sire.ru/wp-content/uploads/2024/07/deti-azii1-1024x768.jpg)
Оҕолорбут ылбыт төрдүс миэстэлэрэ кыһыылаах дуу, үөрүүлээх дуу? Оонньуулар түмүктэринэн быһаччы бу эйгэҕэ үлэлиир дьон уонна успуорду сырдатар суруналыыстар санааларын истиэҕиҥ.
Александр Андреев, Спортивнай резервэни бэлэмниир киин дириэктэрэ:
– Ааспыт Оонньууларга Владивостокка тиийэн, 37 мэтээллээх кэлбиппит. Төһө да аҕыйах соҕус буолан бардарбыт, син биир өрөспүүбүлүкэ сүүмэрдэммит хамаандата тиийдэҕэ дии. Онон быйылгы Оонньуулар биир улахан соруктара – элбэх мэтээли ылыы этэ.
Эрдэттэн ханнык тас дойдулар, Араcсыыйа эрэгийиэннэрэ төһө кыттааччылаах кэлэллэрин көрөн олорбуппут. Онон, быһа холуйан, 50 мэтээли ылыахпыт диэн сабаҕалыы сылдьыбыппыт. Ону баара Узбекистан, Сибиирдээҕи уокурук, Беларусь хамаандаларын кэнниттэн Саха сирин 1 №-дээх хамаандата 25 кыһыл көмүс, 26 үрүҥ көмүс, 30 боруонса мэтээллэнэн (барыта 81) төрдүс миэстэни ылла.
2 №-дээх хамаанда 25 мэтээллээх: 3 кыһыл көмүс, 7 үрүҥ көмүс уонна 15 боруонса. Бу официальнай мэтээллэр. Итиннэ алыш тустуу курдук көрдөрүү быһыытынан ыытыллыбыт күрэскэ ылбыт мэтээллэрбитин эптэххэ, 111 мэтээл буолар. Онон көрдөрүү үчүгэй, былаан туолла. Оҕолор үчүгэйдик кытыннылар, төрөөбүт истиэнэлэрэ көмөлөстүлэр. Бүтэһик үһүс миэстэ иһин киирсиигэ 2 очукуонан кыл мүччү кыайтардыбыт. Москва хамаандатын кытта кыһыл көмүс мэтээлбит ахсаана тэҥнэһэн хаалбыта, оттон үрүҥ көмүһү ааҕыыга биһиэхэ 6, кинилэр киэнэ 10 буолан, төрдүс миэстэҕэ таҕыстыбыт. Бу туспа судаарыстыбалар, улахан кыахтаах уокуруктар, Москва курдук куорат талыллан кэлбит хамаандаларын кытта биһиэннэрэ иҥнэн-толлон турбакка тэҥҥэ кииристилэр. Кик-боксиҥҥа, атах оонньууларыгар, национальнай көрүҥнэрбитигэр элбэх мэтээли ыллыбыт. Оҕунан ытааччылар, художественнай гимнасткалар, футзал оонньооччулара үөртүлэр. Волейболга, баскетболга эрэ ылбатыбыт. Успуорт диэн успуорт, кыайыахтаах оҕо кыайтаран хаалар, ол икки ардыгар атын оҕоҥ кыайан кэбиһэр. Дьэ итинник икки нэдиэлэ устата күүрээннээх күрэхтэһиилэринэн олордубут. Сорохтор урут наар бастыыр этибит диэн этэллэр, итиннэ маннык диибит: урут көрө-истэ курдук кэлэр эбит буоллахтарына, билигин бүтүн судаарыстыбалар бастыҥтан бастыҥ оҕолоро кыттардыы буолбакка, кыайардыы оҥостон кэлэллэр. Дьэ онно биһиги оҕолорбут дьоһун киирсиини көрдөрдүлэр диэн хайгыахха эрэ наада. Мантан салгыы күрэхтэһиилэр элбэхтэр, сайдарга усулуобуйа баар.
Петр Павлов, “Дьулурҕан” хаһыат эрэдээктэрэ:
– Биһиги 1 №-дээх хамаандабыт оҕолоро 4 миэстэ буолбуттарын олох үчүгэй көрдөрүү диибин. Узбекистан, Сибиирдээҕи уокурук, Беларусь хамаандаларыгар холоотоххо, кыракый эрэгийиэн буоллахпыт. Онон тоҕо үс иһигэр киирбэтибит диэн көрөөччүлэр мыыналларын ылыммаппын. Бэйэ дьиэтин эйгэтигэр кыттыы олус эппиэттээх, аны оҕо уйулҕата уйан, онон тириэньэрдэр өттүлэриттэн итиннэ эмиэ ураты сыһыан наада.
Төһө кыайарбынан күрэхтэһиилэргэ сылдьа сатаатым. 24 көрүҥ диэн наһаа элбэх эбит, онон уончаҕа – самбоҕа, тустууга, боксаҕа, о.д.а. сырыттым. Онно көрдөххө, үксүлэрэ титуллаах – Азия, Европа чөмпүйүөннэрэ, призердара, маастарга хандьытааттар кытталлар. Биһиги оҕолорбут сүрүннээн өрөспүүбүлүкэ чөмпүйүөннэрэ. Онон бу оҕолорго болҕомто биэрэн, салгыы үлэлиир сорук турар. Успуорпут кэскилэ кинилэр буоллахтара.
Владислав Коротов, спортивнай суруналыыс:
– Төрдүс миэстэ буолуо суохпутун сөп этэ, өскөтө оҕолорбут ханнык көрүҥнэргэ кыахтаахтарын эрдэттэн ааҕынан-суоттанан көрүммүппүт буоллар. Холобур, саамай элбэх наҕараада ылар көрүҥмүт – дуобат, ону устан баран, го диэни киллэрдибит. Тустуу алта көрүҥэ баар – көҥүл тустуу, хапсаҕай, дзюдо, самбо, кураш, алыш. Аһара элбэх. Ити оннугар хапсаҕайга, мас тардыһыытыгар элбэх ыйааһыны киллэрбит буол. Мэтээл аахсыытыгар 3 иһигэр киириэхпит хаалла. Аны кыахтаах оҕону олох үчүгэйдик кэтээн көрөн, 1 №-дээх хамаандаҕа киллэриэххэ наада этэ. 2 №-дээх хамаанда 25 мэтээли ылла дии. Урут бэлэмнэнии түөрт сыл инниттэн барара, онон олох эрдэттэн болҕомто ууран үлэлиэххэ наада. Көрдүбүт дии, бүтүн судаарыстыбалар сүүмэрдэммит хамаандаларын ыыталлар. Узбекистан успуорка болҕомтотун уурарын кытта, оҕолоро хайдах курдук күүһүрэ түстүлэр. Аны Азия континеныгар суох Беларусь киирэн, бэрт кыранан кыһыылаахтык иннибитигэр түстэ.
Аны Оонньууларга 16 саастарыгар диэри кытталлар диэн быһаччы этэн кэбиһиэххэ наада, көрүҥтэн тутулуга суох. Хас биирдии көрүҥ балаһыанньата уларыйа турара табыллыбат.
Владивостоктан саҕалаан волонтердары өрө тутуу наһаа барда, дьиҥэр, бу спортсменнар бырааһынньыктара, кинилэр тэрээһиннэрэ. Волонтер диэн бэйэтин баҕатынан кэлэн көмөлөһөөччү, ас-таҥас көрдөөбөт. Бэйэм элбэх тэрээһиҥҥэ волонтердуубун, тугу да көрдөөбөппүн. Ол оннугар спортивнай күрэхтэһиилэри сэргэ культуурунай тэрээһиннэр, холобур “Мамонтенок” ыытылларын биһириибин. Урут ЮНЕСКО шедеврдэрэ кэлэллэрэ эмиэ интэриэһинэй этэ. Оонньуу тэрээһинэ бары өттүнэн туох да моһоло суох, эппиккэ дылы эҥкилэ суох ааста.
Сообщить об опечатке
Текст, который будет отправлен нашим редакторам: