Төрдүс уонна онтон кэлэр оҕоҕо ийэ хапытаала бэриллэр сокуона ылылынна

Бүгүн Ил Түмэн 11-с уочараттаах пленарнай мунньаҕар норуот дьокутааттара 203-7 №-дээх «Дьиэ кэргэн» өрөспүүбүлүкэтээҕи ийэ хапытаалын туһунан» Саха Өрөспүүбүлүкэтин сокуонун 2 уонна 6 ыстатыйаларыгар уларытыылары киллэрии туһунан» сокуон бырайыагын көрдүлэр уонна бүтэһик ааҕыыга ылыннылар.

Бу сокуон бырайыагын Ил Дархан Айсен Николаев көҕүлээн ааспыт сыл ахсынньытыгар Ил Түмэҥҥэ туһаайан этиитигэр туруорбута.

«Дьиэ кэргэн» өрөспүүбүлүкэтээҕи ийэ хапытаала 2025 сыл тохсунньу 1 күнүттэн төрөөбүт төрдүс уонна онтон кэлэр оҕолордоох (ол иһигэр иитэ ылыллыбыт оҕолорго) дьиэ кэргэҥҥэ бэриллиэҕэ. Биир кэмнээх төлөбүр кээмэйэ «Үйэ оҕолоро» тус хапытаалы учуоттаан 433 тыһыынча солкуобайга тэҥнэһиэҕэ. Бу сокуон олоххо киириитэ элбэх оҕолоох ыалга дьоһуннаах көмө буолара саарбаҕа суох.