«Төрөөбүт дойдуга таптал, норуокка анаммыт олох»

Горнай улууһугар Бэрдьигэстээххэ П.Д.Аввакумов аатынан киин бибилэтиэкэҕэ Аҕа дойду Улуу сэриитин сылларыгар Үлэ фронун кыттылааҕа, комсомольскай, партийнай үлэһит, Горнай, Кэбээйи оройуоннарын Бочуоттаах олохтооҕо Прокопий Егорович Агеев «Төрөөбүт дойдуга таптал, норуокка анаммыт олох» диэн олоҕун, үлэтин сырдатар кинигэ биһирэмэ буолла.
Төрөөбүт дойдутун сайдыытын, кэскилин туһугар олоҕун анаабыт, Горнай улууһун уһулуччулаах салайааччыта, норуотун ааттатар чулуу киһибит Прокопий Егорович Агеев буолар.
Кинигэ туһунан библиографическай ырытыыны Горнайдааҕы кииннэммит библиотечнай ситим библиограба Анастасия Заровняева оҥордо.

Кинигэни хомуйан оҥордулар Любовь Агеева — Прокопий Агеев улахан кыыһа, Российскай Федерация уопсай үөрэхтээһинин Бочуотаах үлэһитэ, СӨ үөрэҕириитин туйгуна, «Гражданскай килбиэн» бэлиэ хаһаайына, Тимур Агеев — Прокопий Агеев улахан сиэнэ, Горнайдааҕы ветеринарнай управление ветеринарнай тэрээһиннэрин ыытар салаатын сэбиэдиссэйэ, Мария Агеева Прокопий Агеев сиэн кийиитэ, Горнайдааҕы ветеринарнай управление лабораториятын сэбиэдиссэйэ.
Кинигэни бэчээккэ РФ Суруналыыстарын сойууһун чилиэнэ Василий Алексеев бэлэмнээтэ, эрээдэктэрдээтэ. Василий Ильич П.Е.Агеевы кытта алтыспытын, кинигэни таһаарыыга үлэ хайдах ыытыллыбытын кэпсээтэ.
Прокопий Егорович Агеев төрөөбүт улууһа сайдарыгар үрдүк таһаарыылаахтык үлэлээн-хамнаан, ситиһиилээхтик салайан, дьон-сэргэ олоҕо тупсарыгар, араас элбэх өрүттээх үлэни ыытан, өрөспүүбүлүкэ, улуус уопсастыбаннай-бэлитиичэскэй, социальнай-экэнэмиичэскэй, култуурунай сайдыытыгар сүдү кылаатын киллэрсибитэ. Кинигэ сүрэхтэниитигэр Алгыс Стручков Горнай улууһун баһылыгын бастакы солбуйааччы, Алексей Аргунов Бэрдьигэстээх нэһилиэгин баһылыга, П.Е.Агеев төрөөбүт нэһилиэгиттэн баһылык Иван Петров кыттыыны ыллылар.

Күндү ыалдьытынан СӨ норуодунай cуруйааччыта Николай Лугинов буолла. П.Е.Агеев Кэбээйигэ үлэлиир сылларыгар Николай Алексеевич дьонун кытта доҕордоһор, табаарыстаһар этэ. Н.А.Лугинов истиҥ-иһирэх ахтыы оҥордо.

Прокопий Егорович Агеев 1965-1971 сылларга Кэбээйи райсоветын исполкомун бэрэссэдээтэлинэн таһаарыылаахтык үлэлээн ыарахан сылларга улуус чэлгийэ сайдарыгар улахан төһүү күүс буолбута, сайдыы суолугар киллэрбитэ. Кэбээйиттэн улуустааҕы бибилэтиэкэ дириэктэрэ Анна Ионова улуус баһылыгын Иван Левин аатыттан эҕэрдэ суругу туттарда, П.Е.Агеев Кэбээйигэ үлэлээбит сылларын сырдатта.

Кинигэҕэ баай ис хоһоонноох ыстатыйалар киллэриллибиттэр. Үөрүүлээх тэрээһиҥҥэ аймаҕа Марина Андреева — СӨ нэһилиэнньэтин социальнай көмүскэлин үтүөлээх үлэһитэ, улуустааҕы Ытык сүбэ бэрэссэдээтэлэ, Горнай улууһун Бочуоттаах олохтооҕо, Владимир Парфенов СӨ үөрэҕириитин үтүөлээх үлэһитэ, суруналыыс, кыраайы чинчийээччи, СӨ тыатын хаһаайыстыбатын үтүөлээх үлэһитэ, үлэ уонна успуорт ветерана, Варвара Сметанина улуустааҕы үөрэх управлениетын начальнига истиҥ ахтыылары оҥордулар. П.Е.Агеев быраата Гаврил Осипов кэргэнинээн Полиналыын истиҥник санаан-ахтан аастылар, “Сайыҥҥы Сиинэҕэ” ырыаны бэлэхтээтилэр.
Прокопий Егорович уонна кини тапталлаах кэргэнэ, Российскай Федерация үтүөлээх учуутала, Горнай улууһун Бочуоттаах олохтооҕо Мотрена Ивановна Винокурова улууспут киэн туттар сис ыаллара, киһи быһыытынан бастыҥнара, кэрэлэрэ, олох суолугар, билии-көрүү киэҥ далайыгар кэнчээри ыччаты сирдээһиннэрэ биир дойдулаахтарын үтүмэн көлүөнэ дьонугар үтүө холобур буолар. Үс оҕолоро, Любовь Прокопьевна учуутал идэтин баһылаан, Бэрдьигэстээх улуустааҕы гимназиятыгар дириэктэрдиир, Вера Прокопьевна Өрт, Надежда Прокопьевна Кэптин учаастактааҕы балыыһаларыгар быраастарынан эҥкилэ суох үлэлээн, төрөөбүт улуустарын сайдыытыгар улахан өҥөлөөхтөр. Кинилэр оҕолоро, сиэннэрэ ытык-мааны дьоннорун олохторун сиэрдээхтик салгыыллар.
Тэрээһин түмүгэр Любовь Агеева аймахтарын аатыттан кинигэҕэ үлэлээбит, өйөөбүт дьоҥҥо махтал суруктары, мустубут дьоҥҥо аҕаларын, эһээлэрин П.Е. геев туһунан кинигэлэрин бэлэх уунна.
Үтүө киһи аата үс үйэ тухары ааттанар диэн өс хоһоонугар этиллэринии, киэн туттар салайааччыбыт, Горнай уонна Кэбээйи улуустарын Бочуоттаах олохтооҕо Агеев Прокопий Егорович аата-суола, дойдутун, норуотун туһугар айбыт-туппут, үлэлээбит олоҕо кэнчээри ыччакка суолдьут сулус буолан, билиигэ-көрүүгэ, сайдыыга күннэтэ салайсар.

Айталина Санникова,

П.Д.Аввакумов аатынан инновационнай үлэҕэ бибилэтиэкэр,

Горнай, Бэрдьигэстээх.