Төрөөбүт тылы сайыннарыыга

Бу күннэргэ Таатта улууһугар төрөөбүт тылы чинчийэр киин салайааччыта, педагогическай билим доктора, СӨ Билимин академиятын бэрэпиэссэрэ Феодосия Габышева, бу киин сүрүннүүр  научнай үлэһитэ,  педагогическай билим хандьыдаата Надежда Васильева, Саха гимназиятын дириэктэрэ, педагогическай  билим хандьыдаата Валентина Софронеева үлэлээтилэр.

Ыалдьыттар Ытык Күөлгэ, Чычымахха сылдьан сүрүннээн үөрэх эйгэтигэр үлэ-хамнас торумун билистилэр.

Салгыы аһаҕас халлаан анныгар турар Чөркөөх түмэлигэр сэбиэдиссэй Михаил Протодьяконовтыын төрөөбүт тылы сайыннарыы хайысхатыгар ыытыллар үлэлэри, үлэ-хамнас тула кэпсэттилэр. Кэпсэтиигэ Дьокуускай куорат Саха гимназиятын учуутала Егор Жерготов,  Чөркөөх орто оскуолатын дириэктэрэ Егор Лебедев, Матрена Лукачевская кыттыыны ыллылар.

2010 сыллаахха Чөркөөх орто оскуолатын баазатыгар сылы эргиччи үлэлиир «Сардаана» лааҕыр аһыллыбыта. «Сардаана» лааҕыр саха уһулуччалаах киһитэ  Былатыан Ойуунускай төрөппүт кыыһын кэриэһигэр ааттаммыта. Манна даҕатан бэлиэтээтэххэ, оччолорго Ф.В.Габышева СӨ Бырабыыталыстыбатын бэрэссэдээтэлин солбуйааччынан үлэлии олорон бу лааҕыры бэйэтэ кэлэн аспыта, үлэ аартыгар киллэрбитэ.

Феодосия Васильевна, норуоппут интеллигенцията, саха литературата, духуобунаспыт, итэҕэлбит  сүнньүлээн оҥоһуллубут сиригэр, ытык Таатта улууһугар, хас сыл аайы кэлэбит,  үлэни-хамнаһы торумнаһабыт, сүбэлэһэбит диэтэ.

«Быйыл кыһын биир оннук былааннаммыт  хайысхаҕа, улууска саха суругунан литературата төрүттэммитэ 125 сыллаах Ийэ тыл пуорумугар биһиги кииммит  кыттыыны ылбыта. Ол курдук, салгыы ханнык бырайыактарга үлэлииргэ,  олоххо киириэхтэрин сөбүн түмэл сэбиэдиссэйэ М.А.Протодьяконовы кытары ырытан, сүбэлэһэн баран улуус  баһылыгын А.С.Бурцевы кытары көрүстүбүт. Манна 2027 сыллаахха А.Е.Кулаковскай-Өксөкүлээх Өлөксөй төрөөбүтэ 150 сылыгар ыытыллар улахан тэрээһиннэргэ улуус хайдах кыттыан сөбүн, туох үлэни ыытыахха сөбүн кэпсэттибит. Ол түмүгүнэн улууска ханнык дьаһаллар ылыллыахтарын, өрөспүүбүлүкэ таһымыгар туох дьаһаллар тахсыахтарын сөбүн, билим, биһиги кииммит,  тыл, аҕыйах ахсааннаах омуктар үнүстүүттэрэ, Саха сиригэр баар билим академията уонна бары уопсастыбаннай тэрилтэлэр, министиэристибэлэр  кыттыһан улахан хамсааһыны таһаарарга сүбэ-ама быһыытынан кэпсэтии барда. Духуобунай баайбытыгар тирэҕирэн инники сайдыыны торумнуурга кэнсиэпсийэ оҥорон, духуобунас пуорумун ыытарга сүбэлэстибит. Чөркөөх орто оскуолатыгар баар «Сардаана» лааҕыр салгыы оскуола иһиттэн — эрэгийиэн таһымыгар уонна бу аһаҕас халлаан анныгар турар Чөркөөх, П.А.Ойуунускай аатынан Судаарыстыбаннас  түмэл комплекстарын кытыннаран тэнийэн үлэлиирин ырыттыбыт.

Чычымахха эмиэ үчүгэй көрсүһүүлэр, тэрээһиннэр буоллулар. Бары сүбэнэн-аманан бииргэ үлэлээтэхпитинэ өссө үчүгэй түмүктэргэ кэлиэхпит диэн эрэнэбин», — диэн эттэ Феодосия Васильевна.

Салгыы түмэл сэбиэдиссэйэ Михаил Протодьяконов ыалдьыттары саха суругунан литературатын төрүттээбит, айар тыл аҕата А.Е.Кулаковскай-Өксөкүлээх Өлөксөй мэҥэ өйдөбүнньүгэр сырытыннаран, төрөөбүт тыл суолтатын өссө тоһоҕолоон бэлиэтээн, салгыы бииргэ үлэлиэҕиҥ, саҥа бырайыактарбытын олоххо киллэрэн иһиэҕиҥ,  диэн эттэ.

С Халгаева.