Төрөппүттэр бырайыактара биһирэбили ылар

Горнай улууһугар Атамай бырайыагы толкуйдааһыҥҥа улууска, өрөспүүбүлүкэҕэ бастыҥ нэһилиэгинэн биллэр.

Манна даҕатан эттэххэ, бырайыагы толкуйдааһын судургу буолбатах. Бу дьоҥҥо-сэргэҕэ туһалаах, кэскиллээх буоллун диэн дириҥ толкуйтан, мындыр өйтөн, уһуну-киэҥи толкуйдааһынтан, сыраттан тахсар. Ол курдук, биһиги нэһилиэкпитигэр сыл устата бырайыактааһыны көҕүлүүр элбэх тэрээһин тиһигин быспакка ыытыллар буолбута ыраатта. Маныаха оскуола оҕолоругар социальнай бырайыактааһыны үөрэтэр уруок баара кытары элбэҕи кэпсиир.

Ол курдук, соторутааҕыта В.Д.Лонгинов аатынан Атамай орто оскуолатыгар төрөппүттэр дэкээдэлэрин бастакы тэрээһинэ сэргэхтик саҕаланна. «Инникини түстүүргэ түмсүүнэн» диэн тэрээһиҥҥэ 30 төрөппүт биэс хамаандаҕа арахсан, төрөппүттэр көҕүлээһиннэринэн тэриллэр бырайыактары суруйдулар.

Бырайыактары көмүскээһин түмүгүнэн «Сеть семейных лагерей «Уйгу-Быйаҥ» бырайыак хамаандата кыайыылаах тахсан, Арассыыйатааҕы күрэскэ кыттар буолла. Атын хамаандалар бырайыактарын: Ала ууһа Атамай сирдэринэн тэриллэр эспэдииссийэ; төгүрүк сыл устата ыытыллар хайыһар дьарыгын тэрийии; саха култууратын сайыннарар балаҕан үлэтин тэрийии; оҕолору бөҕү сортировкалыырга, пластигы переработкалыырга үөрэтэр тэрээһиннэри тэрийии бырайыактара эспиэртэр үрдүк сыанабылларын ылан, атын күрэстэр көмөлөрүнэн уонна оскуола, төрөппүт, нэһилиэк күүһүнэн хайаатар да олоххо киллэрэргэ диэн сүбэлэстилэр.

Атамайдар ити курдук оҕолуун, төрөппүттүүн, бүтүн нэһилиэгинэн бырайыагы өрө тутан, күннээҕи уопсастыбаннай үлэ оҥостон үлэлии-хамсыы, дойдуларын сайыннара олороллоро кэрэхсэбиллээх.

Татьяна Павлова

Атамай, Горнай.

Татьяна Павлова хаартыскаларга түһэриитэ.