Террору утары үлэлиир хамыыһыйа мунньаҕа буолла

Кулун тутар 14 күнүгэр Айсен Николаев Өрөспүүбүлүкэтээҕи террору утары үлэлиир хамыыһыйа мунньаҕын ыытта. Манна тырааныспар, энэргиэтикэ комплексын эбийиэктэригэр терроризмтан көмүскэллээх буолуу боппуруостарын көрдүлэр.

Мунньахха Ил Дархан улахан суолталаах эбийиэктэргэ куттал суох буолуутун хааччыйар туһуттан, кэлимник дьаһанан, эбии миэрэлэри ылынар наадалааҕын тоһоҕолоон бэлиэтээтэ.

Мунньах кыттааччылара терроризмтан көмүскэллээх буолууга, буруйу оҥорууну намтатыыга, быраабы утары дьайыылары сэрэтэргэ чопчу быһаарыылары ылыннылар. Холобур, энэргиэтикэ эбийиэгэр пилота суох көтөр тэриллэри туһанан, атаакалыыр түгэннэригэр, көмүскэли хайдах хааччыйар туһунан кэпсэттилэр.

Маны тэҥэ, Кыайыы 80 сылын бэлиэтииргэ куттала суох буолууну хааччыйар эбии миэрэлэри ылынарга болҕомтону туһаайдылар.

Ил Дархан, бырабыыталыстыба пресс-сулууспата.