Хаартыска: ааптар тиксэриитэ
Төрүт ыал төрүөҕэ, ытык ыал ыччата төрдүн-ууһун билэргэ дьулуһар. Дьаҥхаады нэһилиэгин дьоно-сэргэтэ удьуор үөрэҕин олоҕу хамсатар күүс быһыытынан ылынабыт. Кулун тутар 17 күнүгэр нэһилиэкпит «Өбүгэ ситимэ» тосхолун туһаайыытынан, Төхтүр орто оскуолатыгар дириэктэр Макаров М.М. өйөбүлүнэн, «Төрүччү төрдө» сэһэргэһии ыытылынна.
Ыҥырыылаах дьоммутунан буоллулар: СӨ хотугу норуоттар этнологияларын чинчийэр уопсастыбаннай институтун салайааччы Константин Аргунов уонна СӨ национальнай архыыбын докумуоннары туһаныыга салаатын салайааччы Петр Корякин.
Петр Иванович кэпсэтиини саҕаланыан иннинэ өбүгэ ситимин туттарар Айыыларга хайыһыы сиэрин-туомун оҥордо.
Салҕыы ыалдьыппыт бэйэтин идэтин көрүүтүнэн урууну-аймаҕы ааҕыыны билиһиннэрдэ. Национальнай архыып төрүччүгэ сыһыаннаах докумуоннарын хайдах туһанан ыспыраапка оҥороллорун туһунан быһаарда. Билиҥҥи кэмҥэ наадыйар дьон аһары элбээбиттэрин иһин, икки сыл устата төрүччүгэ сакааһы ылбат буолбуттар. Билигин баҕалаах киһи бэйэтин төрүччүтүн үөрэтэн, үлэтин саҕалыырыгар «ЭИС-ЭЛАР» электроннай баазаны хайдах туһанарыгар 147 слайдаах презентацияны көрдөрөн сиһилии билиһиннэрдэ. Онно Сахабыт сиригэр биллэр дьоммут төрүччүлэрин кытта билиһиннэрдэ. Төрүччүгэ сыһыаннаах докумуоннар ханнык пуондаларга харалла сыталларын уонна кинилэр суолталарын арыйда. Мустубут дьоҥҥо Дьаҥхаады нэһилиэгин төрүччүтүн туһунан докумуоннар сигэлэрин көрдөрдө, хаартыскаҕа түһэрэн ыллылар. Дьаһалтаҕа, оскуолаҕа «Якутский архив» сурунаал бүтэһик нүөмэрин бэлэх уунна. Инникитин Төхтүрдэрдиин маннык салҕыы үлэлииргэ эрэннэрдэ.
Константин Ильич дьон төрүччүтүн оҥоруутугар бэйэтин үлэтин баай уопутун билиһиннэрдэ. Норуокка ийэ, аҕа ууһунан хаан хайдах уларыйарын кэпсээтэ. «Древо жизни» алтыс саҥардыллыбыт хайысханан хайдах туһаныахха сөптөөҕүн ымпыгар-чымпыгар тиийэ үөрэттэ уонна истээччилэрин төрүччүлэрин электроннай баазаҕа киллэрэллэригэр көрдөстө. Кэнэҕэски өттүгэр нэһилиэк салалтатын кытта үлэни салҕыы ыытар, Национальнай бибилэтиэкэни кытта өссө кэлэ сылдьар баҕалааҕын эттэ.
Бу сэһэргэһиигэ кэлбит дьон бука бары астынан, дуоһуйан тарҕастылар. Төрүччү билиитин биэрбит дьоммутугар Александр Ильич Аргуновка, Петр Иванович Корякиҥҥа Дьаҥхаады нэһилиэгин олохтоохторо барҕа махталбытын тиэрдэбит. Удьуор, уруу-хаан, аймах-хаан төрдүттэн тардыылаах төрүччүбүт үөрэҕин аартыга арылла турдун.
Анна ХОЛМОГОРОВА, Дьаҥхаады нэһидиэгэ, Мэҥэ Хаҥалас, ааптар хаартыскалара
Бу ураты каарта оҕолорго төрөөбүт дойдуларын дириҥник өйдүүргэ уонна умнуллубат өйдөбүллэри бэлэхтиэҕэ. Манна Саха сирин…
Соторутааҕыта Ыксаллаах быһыы-майгы министиэристибэтин 35 сылыгар аналлаах тэрээһин Уһук Илин бастыҥ баһаарынайдарын түмтэ. Бу туһунан…
От ыйын 3 күнүттэн 5 күнүгэр диэри Нерюнгрига өрөспүүбүлүкэтээҕи Олоҥхо ыһыаҕа ыытылларынан сибээстээн, арыгыны атыылааһыҥҥа…
От ыйын 4-8 күннэригэр Дьокуускайдааҕы VIII норуоттар икки ардыларынааҕы киинэ бэстибээлэ ыытыллыаҕа. Быйылгы бэстибээл сүрүн…
Бүгүн Мииринэй оройуонугар баар «Саха сирин тыыннаах алмаастара» пааркаҕа («Живые алмазы Якутии») пааркаттан үөрүүлээх сонун…
Өлүөхүмэҕэ саҥа оҕо поликлиникатын үөрүүлээхтик астылар. Урут поликлиника 1980-с сыллардааҕы дьиэҕэ баар эбит. Билигин тэрилтэҕэ…