Ааптар хаартыскаҕа түһэриитэ.
Бу күннэргэ Өймөкөөн улууһун нэһилиэктэригэр ситэриилээх былаас отчуота буола турар.
Улуус баһылыга Иннокентий Сивцев Аартыкка, Төрүккэ, Үчүгэйгэ, Өймөкөөҥҥө быйыл ахсынньыга Өймөкөөн улууһун кураторынан анаммыт Айылҕа харыстабылын уонна экология миниистирин э.т. Евгений Перфильевы билиһиннэрдэ.
Нэһилиэктэри кытта билсиһии Төрүттэн саҕаланна. Отчуокка 40 киһи сырытта. Бу нэһилиэккэ кэлиҥҥи сылларга саамай элбэх киһи кыттыбыт суолталаах тэрээһинигэр төрүттэр анаан оҥостон кэлэн, нэһилиэк сайдыытыгар туһуламмыт мунньахха санааларын хото эттилэр. Ол курдук, былырыын Магадаан уобалаһыттан атыыласпыт отторун хаачыстыбата мөлтөҕүн бэлиэтээтилэр. Олохтоохтор анал хамыыһыйа тэрийэн, аактаан туһааннаах тэрилтэҕэ ыыппыттар да, күн бүгүнүгэр диэри туох да биллибэт эбит. Тиэйтэрэн аҕалтарбыт отторун туттубатах буолан, харчытын төннөрөөрү гыналлар. Маны таһынан, «нэһилиэк иһигэр уонна таһыгар турар ЛЭП остуолбаларын тирээбиллэрэ (опора) эргэрэн, сууллан буолан, кутталы үөскэппиттэрэ өр буолла. Аҕыйах сыллааҕыттан үөһэттэн субуруйан турар боробулуоха линията олохтоохторго, дьиэ сүөһүлэригэр кутталы үөскэтэр буолбут. Оскуола аттыгар турар остуолба тирээбилин лиинийэтиттэн уокка оҕустаран, ыанар ынах өлбүтэ. «Теплоэнегосервис» АУо улуустааҕы филиалын салалтатыгар туруорсаммыт, исписэлиистэр хаста да кэлэн көрбүттэрэ эрээри, дьаһал билигин да ылылла илик. Ол иһин ситэриилээх былаас отчуотугар туруорсабыт», — диэн нэһилиэк бэрэстэбиитэллээх уорганын дьокутаата Октябрина Столярчик санаатын тиэртэ. Араас таһымнаах мунньахтарга таарыллар суолу тутуу, сылы эргиччи үлэлиир гына статуһу туруорсуу бырабыыталыстыба отчуотугар эмиэ турда. Маны таһынан, билигин үлэлии турар эргэ кулууп дьиэтин оннугар культурнай-спортивнай комплексы тутуу тула кэпсэтии буолла.
Отчуокка кыттыыны ыла сылдьар «Теплоэнегосервис» АУо улуустааҕы филиалын саҥа анаммыт салайааччылара олохтоохтор туруорсар боппуруостарын сиһилии ырытаары, быһаарыы ылынаары отчуот кэнниттэн хаалан, балаһыанньаны билсэ хааллылар. Хаачыстыбата суох отторун суут эрэ нөҥүө быһаарсар кыахтаахтарын сүбэлээтилэр.
Култуурунай-спортивнай киин тутуута, бастатан туран, бырайыктыыр-сметалыыр документацияны оҥордоххо эрэ, салгыы кэпсэтии барар кыахтаах эбит. Нэһилиэк оскуолата эргэрэн, кыараан, оҕо саадын кытта холбоһон, биир тэрилтэ буолан, саҥа дьиэни тутар уолдьаспытын Бырабыыталыстыба бэрэссэдээтэлин солбуйааччы Сергей Местников бэйэтинэн көрөн билистэ. Онон оскуола салалтата бырайыктыыр-сметалыыр докумуону оҥоруу үлэтин саҕалыаҕа. Олохтоох оскуола дириэктэрэ Гаврил Павлуцкай агрооскуола хайысхатын, үлэтин ис хоһоонун ыйыталаста. СӨ Үөрэҕирии, наука эйгэтигэр тус сыаллаах каадырдары бэлэмнээһин дэпэртээмэнин салайааччытын солбуйааччы Александр Кочмар орто оскуола салалтата сайдыы суолун тобулууга ылсыан баҕарарын биһирээн туран, үөрэх тэрилтэтин бу салаатын сиһилии билиһиннэрэн, быһааран, сүбэлээн биэрдэ.
Ити курдук, ситэриилээх былаас отчуотун Төрүт нэһилиэгин олохтоохторо бэркэ сэргээтилэр, үгүс туруорсуулара боротокуолга киирбититтэн санаалара көнньүөрдэ.
Өрөспүүбүлүкэтээҕи "Оһуокай" түмсүү Дархан этээччитэ Лариса Николаевна оскуола үөрэнэччилэрин дьарыктаабыта ыраатта. Туйах хатарааччылаах бастыҥ этээччибит…
Айсен Николаев Олоҥхо тыйаатырын Саха сирин норуоттарын култуурунай баайын эбийиэгинэн билинэр туһунан Ыйаахха илии баттаата.…
Дьокуускайга 4 №-дээх полиция отделын дьуһуурунай чааһыгар дьахтар суумкатын уордарбытын туһунан сайабылыанньа суруйбут. Кини киин…
Алааска, тыаҕа сылдьан хаһыытыыры, улаханнык айдаарары боболлорун билэргит буолуо. Ону таһынан өссө тугу сэрэтэллэрий, өйдөтөллөрүй?…
Айсен Николаев Судаарыстыбаннай Мунньахха (Ил Түмэҥҥэ) туһаайан этиитигэр дьиэ кэргэннээх үлэһиттэри өйүүр миэрэлэри олоххо киллэрэргэ…
Үгүс үбүлүөйдээх тэрээһиннэринэн баай Өлүөхүмэ улууһун 1-Нөөрүктээйитээҕи модельнай бибилэтиэкэҕэ, ааспыт нэдиэлэҕэ сылы түмүктүүр тэрээһин буолан…