Төрүт сокуоҥҥа көннөрүүнү ылыныы былаас уоргана көдьүүстээх буоларын толору хааччыйар

Бүгүн Ил Түмэҥҥэ 10 чаастан Саха Өрөспүүбүлүкэтин  Конституциятыгар (Төрүт сокуон) көннөрүүлэри киллэриигэ аналлаах  аһаҕас кэпсэтиилэр буолла. Манна уопсастыбаннас, норуот дьокутааттара,  салайааччылар кытыннылар. 

«Тустаах көннөрүү быраактыка өттүнэн улахан суолталаах. Ол курдук, былаас бары таһымыгар — федеральнайга да, муниципальнайга да — бары өттүнэн чуолкай, сөптөөх алтыһыыга, бииргэ үлэлээһиҥҥэ улахан көдьүүстээх буолуоҕа. Ол түмүгэр өрөспүүбүлүкэ социальнай-экэнэмиичэскэй  сайдыытыгар туһааннаах соруктары  уонна Саха сирин олохтоохторун наадыйыыларын, ыйытыыларын  түргэнник быһаарарга  көмөтө улахан буолуо, олук ууруо», — диэн Ил Түмэн   бэрэссэдээтэлин солбуйааччы Александр Подголов быһааран биэрдэ.

Манна биири өйдүөххө наада. СӨ  Төрүт сокуонугар саҥа нуормалары киллэрии СӨ Ил Дархана эрэгийиэн сиригэр-уотугар аһаҕас былаас тиһигин сүрүннүүргэ уонна нэһилиэнньэ интэриэһин быһаарыыга биир кэлим салалтаны үөскэтиигэ төһүү күүһүнэн буолуоҕа.