Төрүт Сокуоҥҥа киирэр уларытыылар оҕо босхо үөрэнэр быраабын быспаттар

“Саха” ГТРК “Быһа кэпсэтии” биэриитигэр Ил Дархан Айсен Николаев СӨ Төрүт Сокуонугар уларытыылар киирэллэрэ наадатын, федеральнай сокуоҥҥа сөп түбэһиэхтээхтэрин тоһоҕолоон бэлиэтээтэ.

Үөрэхтээһин өттүгэр этэригэр Ил Дархан өрөспүүбүлүкэ Төрүт Сокуонун 22 ыстатыйатыгар киирэр уларытыылар оҕо босхо үөрэнэр быраабын быспаттарын, 9 кылаас кэнниттэн салгыы 11 кылааска диэри үөрэнэрин дуу, орто анал үөрэхтэргэ киирэрин дуу  төрөппүттэрин кытта бэйэлэрэ талаллар, диэтэ.

“Төрөппүт оҕотун 9 кылааһы бүтэрэрин хааччыйыахтаах. Ол кэннэ оҕо колледжтарга үөрэнэ барарын ким да хааччахтаабат. Оттон оҕо салгыы 10-11-с кылаастарга үөрэнэр баҕатын эмиэ ким да мэһэйдэһэр бырааба суох”, — диэн быһааран биэрдэ Ил Дархан.