Төрүт Сокуону сыл аайы хамсаппат туһуттан

Владимир Прокопьев, олохтоох бэйэни салайыныыга Ил Түмэн бастайааннай кэмитиэтин бэрэссэдээтэлэ:

— Биһиги Төрүт Сокуоммутугар олохтоох бэйэни салайыныы туһунан 8-с разделга 5 ыстатыйа баар, ол онно үс ыстатыйатыгар уларытыы киириэхтээх. Сүрүннээн тиэхиньиичэскэйдэр, тоҕо диэтэххэ 97-с ыстатыйаҕа бу бэс ыйыттан үлэлии турар федеральнай сокуоҥҥа хайдах суруллубутунан биһиги сүрүн өйдөбүллэри суруйуохтаахпыт. Ол биһиэхэ эрэ буолбатах, Арассыыйа үрдүнэн бары субъектар бары оннук дьаһаналлар. Тоҕо диэтэххэ, бу сүрүн бириинсиптэр. 100-с ыстатыйаҕа хас да боломуочуйа көрүҥэ өссө 1992 сылтан сурулла сылдьар. Оттон олох уларыйыытынан, бу кэлиҥҥи сылларга сокуон бөҕө уларыйда, боломуочуйалар хамсыы тураллар. Ол иһин биһиги Төрүт Сокуоммутун сыл аайы хамсаппат наадаттан уопсай универсальнай өйдөбүллэри киллэрэн баран, боломуочуйалары биһиги бэйэбит сокуоммутугар – олохтоох бэйэни салайыныы туһунан сүрүн сокуоҥҥа уонна атын да сокуоннарга чопчулаан суруйуохтаахпыт. Өскөтүн биһиги бу боломуочуйалары барытын Төрүт Сокуоҥҥа суруйуохха диир буоллахпытына, онно хас да уонунан страницаны киллэрэргэр тиийэҕин. Оннук табыллыбат. Оттон 101-с ыстатыйаҕа этиллэринэн, суутунан эрэ көтүрүллүөхтээх диэн сыыһа, тоҕо диэтэххэ олохтоох бэйэни салайыныы уорганнара бэйэлэрэ да суут нөҥүө күһэйиллибэккэлэр, бэйэлэрэ көннөрөр бырааптаналлар.

Манна быыбар туһунан боппуруос олох да турбат, быыбар атын сокуонунан быһаарыллар. Онон итини киллэрэн, дьону бутуйуу, сыыһа өйдөбүлгэ киллэрии барар диэн этиэххэ наада.