«Төрүт түөлбэм төлкөтө» түөлбэ актыбыыстарын өрөспүүбүлүкэтээҕи пуорума

Мэҥэ Хаҥалас улууһугар Майаҕа «Төрүт түөлбэм төлкөтө»  түөлбэ актыбыыстарын II-с өрөспүүбүлүкэтээҕи пуорума буолла.

Тэрийээччилэринэн  Мэҥэ Хаҥалас улууһун социальнай  бэлиитикэҕэ управлениета, СӨ түөлбэлэрин Ассоциацията, СӨ Ыччат дьыалаларыгар уонна социальнай коммуникацияларга министиэрситибэтэ, СӨ муниципальнай тэриллиилэрин Сэбиэтэ буолаллар. Пуоруму ыытыы сыала-соруга олохтоох  бэйэни салайыныы тиһигин суолталаах боппуруостарынан дьарыктанан сайыннарыы.

Өрөспүүбүлүкэҕэ түөлбэлэр сайдыыларын саамай тутаах боппуруостарын уонна этиилэрин дьүүллэстилэр, кыттааччылар түөлбэ үлэтигэр үөрүйэхтэрин, сатабылларын атастастылар. Пуорум үлэтин кэмигэр Амма, Таатта, Мэҥэ Хаҥалас, Горнай, Чурапчы оройуоннарын түөлбэлэрэ бастыҥ быраактыкаларын билиһиннэрдилэр. Ону сэргэ, Ыччат дьыалаларыгар уонна социальнай коммуникацияҕа министиэристибэ исписэлиистэрэ түөлбэлэр Ил Дархан граныгар кыттыыларыгар сүбэ-ама биэрдилэр.

Пуорум иитинэн улуус, нэһилиэк дьаһалталара экспертнай бөлөҕү кытта түөлбэ тула бииргэ үлэлээһин механизмнарын уонна социальнай кыһалҕалары быһаарыыга кыттыгас саҥа толкуйдары, быһаарар, тобулар кыахтары дьүүллэстилэр. Эспиэрдэр НКО, ТОС регистрациялааһын, отчуоттааһын боппуруостарыгар, социальнай бырайыактааһыҥҥа үөрэттилэр.

Тэрээһин түмүгэр түөлбэ  үлэтин-хамнаһын сүрүн соруктарынан «Бириэмэ капсулата» оҥоһулунна, ону сэргэ кэлэр биэс сылга баҕа санаалар этилиннилэр. Мэҥэ Хаҥалас оройуонун баһылыгын солбуйааччы Альбина Григорьева өрөспүүбүүлүкэҕэ ТОС Ассоциациятын бэрэссэдээтэлигэр  Ксения Васильеваҕа  капсуланы туттарда. Капсуланы 2027 сылга арыйыахтара.

Пуорум сабыллыытыгар 289 дэлэгээт алгыстаах саламата ыччат уонна социальнай коммуникация дьыалаларыгар министри солбуйааччы Андрей Сосновскайга туттарылынна.

Пуорум түөлбэлэр сайдыыларыгар саҥа үктэлинэн  буолан, биир санаанан салайтаран, дойдубут сайдарын туһугар  кэскиллээх кэрдиис кэмэ салҕанар.

Айталина Санникова,

Горнай.