«Төрүт тыл төлкөтө түстэннин!» үөрүүлээх тэрээһиҥҥэ ыҥыраллар

Олунньу 13 күнүгэр төрөөбүт тыл уонна сурук-бичик күнэ бэлиэтэнэр. Саха сирин олохтоохторо үрдүктүк тутар, ытыктыыр бырааһынньыктара 1996 сылтан бэлиэтэнэр.

Ийэ тылга аналлаах дэкээдэ иитинэн, бу күн Д.К. Сивцев-Суорун Омоллоон аатынан Саха Өрөспүүбүлүкэтин Опера уонна балет судаарыстыбаннай тыйаатырыгар, киэһэ 18:00 чаастан «Төрүт тыл төлкөтө түстэннин!» диэн үөрүүлээх тэрээһиҥҥэ ыҥыраллар.

Үөрүүлээх тэрээһин иннинэ 17:00 чаастан ийэ тылга аналлаах быыстапка туруоҕа, “Саха тылын быһаарыылаах улахан тылдьытын” куйаар ситимигэр тахсыбыт биэрсийэтин сүрэхтэниитэ буолуоҕа, атыы-эргиэн быыстапкатын, автограф-сиэссийэни тэрийиэхтэрэ.