Төрүүр дьиэҕэ атын аатынан ааттаммыт…

Ленскэй оройуонугар суут ийэтэ буоларын бигэргэтэн баран, оҕону дьиэ кэргэҥҥэ төнүннэрдэ.

Ленскэй оройуонун суутугар дьахтар ийэ буоларын бигэргэтэри туруорсубута. Суут быһаарбытынан, 2020 сыллаахха дьахтар кыыс оҕону төрөппүт, ол эрээри, төрүүр дьиэҕэ киирэригэр тоҕо эрэ бэйэтин аатын кистээбит, атын ааты эппит. Тоҕо маннык гыммытын дьахтар кыайан быһаарбатах.

Ол киирэригэр туох да докумуона суох эбит. Төрөөн баран, оҕотун дьиэтигэр илдьэ тахсыбыт, ол эрээри, тустаах докумуона суох буолан, ЗАГС уорганыгар оҕотун кыайан регистрациялаабатах.

Оҕо биэс сылы быһа төрөөбүтүн туһунан сибидиэтэлистибэтэ суох иитиллэ сылдьыбыт. Онон уһуйааҥҥа да сылдьар кыаҕа суох эбит.

2025 сыл атырдьах ыйыгар эппиэкэ уорганнара оҕону дьиэ кэргэнтэн былдьаан ылбыттар уонна оҕо реабилитационнай киинигэр киллэрбиттэр.

Генетическэй эспэртиисэ оҥорторон, бары ымпыгын-чымпыгын ырытан баран, суут дьахтар ийэ буоларын бигэргэттэ. Оҕону дьиэ кэргэҥҥэ төнүннэрдилэр диэн СӨ сууттарын холбоһуктаах пресс-сулууспалара иһитиннэрэр.