Тиэхиньикэтин уокка былдьаппыт Үлэ Дьоруойугар көмө оҥоһуллуо

Ааспыт сыл бүтүүтэ Уус Алдан улууһугар Үлэ Дьоруойа, Үлэ Албан аата уордьан кавалера, «Удьуор» бааһынай хаһаайыстыба биригэдьиирэ Михаил Николаевич Готовцев гарааһа, онно турбут тиэхиньикэтин кытары бүтүннүү умайан хаалбыта. Маннык ыарахан кэмҥэ бэйэ-бэйэни өйөһөр, көмө буолар наада.

Тыа хаһаайыстыбатын оҥорон таһаарааччытын өйүүр сыаллаах тыа хаһаайыстыбатын миниистирэ Артем Александров уонна Уус Алдан улууһун баһылыга Василий Алексеев көҕүлээһиннэринэн, Арассыыйа Үлэтин Дьоруойа, Үлэ Албан аата уордьан кавалера, «Удьуор» бааһынай хаһаайыстыба биригэдьиирэ Михаил Николаевич Готовцевка тиэхиньикэни ыларга көмөлөһөргө сөбүлэспиттэр.

Меценат, урбаанньыт Руслан Федотов сахалар биир киэн туттар киһибитигэр Михаил Николаевич Готовцевка көмөлөһөргө бэлэммит диэн этэр.

«Саҥа Дьыл быраһынньыгын иннинэ Үлэ Дьоруойа, сахалар бары ытыктыыр киһибит Михаил Николаевич Готовцев туох баар тиэхиньикэтэ уонна гарааһа бүтүннүү умайан хаалбыта. Билиҥҥи уустук кэмҥэ тиэхиньикэни атыылаһар ыарахана биллэр. Ол иһин Тыа хаһаайыстыбатын миниистирэ Артем Александров уонна Уус Алдан улууһун баһылыга Василий Алексеев быһаарыыларынан, кулун тутар ыйга диэри иэс тиэхиньикэ ыларга биһиги тэрилтэбитин кытары дуогабардастылар. 5 мөл. солк. суумаҕа тиэхиньикэни – улахан кыамталаах «Беларус» тыраахтары, погрузчигы бүгүн, сарсын ылыахтаахтар», — диэн Руслан Федотов кэпсээтэ.