Тиэргэҥҥэ саанан ытыалаабыт эр киһи сууттанна

2025 сыл ыам ыйын 9 күнүгэр Дьокуускайга Р.Зорге уулуссатыгар Иркутскай уобаластан төрүттээх 53 саастаах киһи итирик туруктаах сылдьан элбэх кыбартыыралаах дьиэ тиэргэнигэр саанан ытыалаабыт. Бу туһунан СӨ Сууттарын пресс-сулууспата суруйар.

Быһаарыллыбытынан, бу киһи гараастар аттыларыгар матасыыкылынан айаннаабыт эдэр дьону кытта айдаарсыбыт уонна гарааһыттан МЦ 21-12 сааны ылбыт. Онтон ыччаты куттаары, биирдэ сиргэ уонна биирдэ салгыҥҥа ыппыт. Ол кэнниттэн кинини ыаллыы олорор дьоно тохтоппуттар.

Сууттанааччы суукка буруйун толору билиммит, ол эрээри күлүгээннээбэтэҕин эппит, саанан алҕаска ыппытым диэбит.

Суут туоһулар көрдөрүүлэрин, эспэртиисэ түмүгүн көрөн баран, уопсастыбаннай бэрээдэги ыспыт күлүгээннээһин диэн быһаарбыт.

Суут бу киһи эрдэ сууттамматаҕын, үлэтигэр үтүөтүк ахталларын учуоттаан, биир сыл холоон көрөр болдьохтоох  усулуобунайдык икки сылга көҥүлүн быһар бириигэбэри таһаарда.

Бириигэбэр сокуоннай күүһүгэр киирэ илик.