Тиит-Арыы нэһилиэгин баһылыга Григорий Лукин «Служение» бириэмийэ номинана буолла

Хаҥалас улууһун Тиит-Арыы нэһилиэгин баһылыга Григорий Лукин «Служение» диэн Бүтүн Арассыыйатааҕы муниципальнай бириэмийэ номинана буолла. Бу бириэмийэ быйыл бастакытын туттарыллар.

«Служение» бириэмийэҕэ Арассыыйа 89 эрэгийиэниттэн 18 458 сайаапка киирбит, ол иһигэр Уһук Илиҥҥи федеральнай уокуруктан — 1 172. Сайаапкалары көрөн бастакы түһүмэҕи ааспыт номинаннары дьүүллүүр сүбэ быһаарыаҕа. Ахсынньы 25 күнүттэн куоластааһын саҕаланыаҕа. Бу бириэмийэ дойду бэрэсидьиэнэ Владимир Путин сорудаҕынан ыытыллар. Муниципальнай тэриллиилэр сайдыыларыгар кылааттаах дьоҥҥо уонна хамаандаларга ананар.

Григорий Лукин киһини быыһаабытын иһин номинант буолла. Кини 2018 сыллаахха ыам ыйыгар икки миэтэрэ үрдүктэн сууллан муустаах ууга тимирэ сыспыт биир дойдулааҕын олоҕун быыһаабыта. 58 саастаах Татьяна Романова күргэнэн ынахтары туораан иһэн ууга түспүтэ. Ону нэһилиэк баһылыга  Григорий Лукин чугас баар буолан, дьахтары тута быыһаабыта.