Тиит Арыылар ыйытыылара элбэх

Уус Алдан улууһугар Тиит Арыыга ситэриилээх былаас отчуота байыаннай дьайыы боппуруостарыттан саҕаланна.

Семен Аргунов күтүөтэ инбэлиит буолан кэлбитин этэн туран, бу дьон куоракка хайдах дьиэ ылыахтарын сөбүн ыйыталаста. Онно хоруй, быһыытынан СӨ тутуу министиэристибэтэ байыаннай дьайыы кыттыылаахтарын куортам дьиэлэринэн хааччыйарын, министиэристибэҕэ тиийэн учуокка турар наадатын эттилэр.

Тыа хаһаайыстыбатыгар сыһыаннаах кэккэ ыйытыылар киирдилэр: быһыты оҥоруу, өртөөһүн, ирбэт тоҥ ириитинэн тыа хаһаайыстыбатын сирэ-уота алдьаныыта, дулҕаны кэрдии, сири оҥоруу. Өртөөһүҥҥэ күһүҥҥү өртөөһүн баар эбит да, сылгы иитэр дьоҥҥо табыгаһа суох. Онон Тыа хаһаайыстыбатын билим-чинчийэр института сааскы өртөөһүн наадалааҕын билим күүһүнэн дакаастыыр сыаллаах үлэлии сылдьар. Итиннэ 4 сыл наада.

Тутуу өттүгэр биир сэргэх сонун баар — «Үтүө дьыаланан» 4 кыбартыыралаах уопсай дьиэ тутулла турар.
Аны уһуйаан тутуута эмиэ сытыытык турар нэһилиэгэ — туруорсубуттара сүүрбэччэ сыл буолбут. Уһуйааҥҥа уопсайа 20 оҕо сылдьар. Итиннэ эмиэ түргэнник хомуллар модульнай эбийиэк көмөлөһүөн сөп диэтилэр.
Отчуот түмүгүнэн ситэриилээх былаас үлэтэ сөптөөҕүнэн ааҕылынна.

Ааптар хаартыскаларга түһэриитэ